Ռոտշիլդների ընկերությունը կօգնի Վրաստանին

Աշխարհի խոշորագույն ֆինանսական խմբերից մեկը՝ Rothschild & Co-ն, կաշխատի Վրաստանը տարածաշրջանային ֆինանսական կենտրոնի վերածելու ռազմավարության մշակման վրա, ասվում է Վրաստանի կառավարության վարչակազմի հայտարարության մեջ։

Համապատասխան համաձայնագիրը Վրաստանի կառավարության և ընկերության կառավարիչ Արիել Մալարդ դե Ռոտշիլդի միջև ստորագրվել է Բրյուսելում։

Ռոտշիլդի հետ Վրաստանի վարչապետ Իրակլի Ղարիբաշվիլիի հանդիպմանը նշվել է, որ ընկերությունը ռազմավարություն է մշակելու Վրաստանը տարածաշրջանային կենտրոն դարձնելու, ինչպես նաև լրացուցիչ ֆինանսական ռեսուրսներ և դրամաշնորհներ ներգրավելու համար։

«Վարչապետի գրասենյակի հետ պայմանավորվել ենք, որ Վրաստանի կառավարությանը խորհրդատվություն կտրամադրենք օտարերկրյա ուղղակի ներդրումների, Վրաստանի՝ որպես ֆինանսական կենտրոնի ձևավորման, ինչպես նաև Վրաստանի համար ֆինանսական ռեսուրսների ներգրավման հետ կապված մի շարք հարցերի շուրջ, որոնք, մեր կարծիքով, նշանակում է շատ հետաքրքիր աշխատանք»,- ասել է Ռոտշիլդը:

Հանդիպմանը նշվել է Վրաստանում բարենպաստ ներդրումային միջավայրը, ինչպես նաև այն խոշոր ներդրումային ծրագրերը, որոնք Վրաստանի կառավարությունը նախատեսում է առաջարկել օտարերկրյա ներդրողներին, այդ թվում՝ ինչպես ֆինանսական կենտրոնների ստեղծումը, այնպես էլ խոշոր զբոսաշրջային, լոգիստիկ և արդյունաբերական նախագծերի իրականացումը։

Rothschild & Co-ն խոշորագույն անկախ ֆինանսական խմբերից մեկն է, որը գործում է աշխարհի ավելի քան 40 երկրներում: