Բրազիլիայում հորդառատ անձրևների հետևանքով՝ 18 մարդ է զոհվել (լուսանկարներ, տեսանյութ)

Բրազիլիայի հարավ-արևելքում՝ Սան Պաուլու նահանգում, առնվազն 18 մարդ է մահացել կիրակի գիշերը հորդառատ անձրևների հետևանքով։ Այս մասին հայտարարել է նահանգապետ Ժոաո Դորիան։

«Խորապես վշտացած եմ Սան Պաուլոյում հորդառատ անձրևների պատճառած վնասի համար: Ցավակցում եմ 18 զոհերի ընտանիքներին և ընկերներին: Մենք փրկարարական գործողություն ենք իրականացնում, հրամայվել է միջոցներ հատկացնել տուժածներին օգնելու համար», - գրել է քաղաքական գործիչը Twitter-ում: 

Ինչպես հաղորդում է Globo հեռուստաալիքը, անձրևները առաջացրել են ջրհեղեղներ և սողանքներ, որոնք հանգեցրել են նահանգի մի քանի մունիցիպալիտետներում բնակելի շենքերի փլուզմանը։ Տեղի իշխանությունների տվյալներով՝ 12 ժամվա ընթացքում որոշ շրջաններում մոտ 115 մմ անձրև է տեղացել։ Նշվում է, որ դրանց պատճառը տաք, խոնավ օդի տեղաշարժն է Ամազոնի հասարակածային անտառներից հարավ-արևելյան ուղղությամբ՝ դեպի Ատլանտյան օվկիանոս:

2020 թվականի հունվարին երկրի հարավ-արևելքում բնական աղետի հետևանքով՝ զոհվել է 66 մարդ։