Ադրբեջանը մտադիր է ավելացնել գազի մատակարարումները դեպի Եվրոպա

«Հաջորդ տարի կավելացվի գազի մատակարարումը դեպի Եվրոպա Հարավային գազային միջանցքով»,- այս մասին հայտարարել է Ադրբեջանի էներգետիկայի նախարար Փարվիզ Շահբազովը՝ ելույթ ունենալով Անթալիայում Դիվանագիտական ​​ֆորումի շրջանակներում էներգետիկ անվտանգության թեմայով պանելային քննարկման ժամանակ, հայտնում է Report-ը։

Նա ընդգծել է, որ Հարավային գազային միջանցքն արդեն ցույց է տվել իր հաջողությունը։

«Այժմ գազը տեղափոխում է Թուրքիա և Եվրոպա։ Ադրբեջանը Կասպից ծովում գազի հսկայական հանքավայրեր ունի, և առկա ենթակառուցվածքը լավ վիճակում է։ Էներգետիկ ոլորտի տարբեր ընկերություններ մեծ հետաքրքրություն են ցուցաբերում Ադրբեջանի հետ համագործակցության նկատմամբ»,- ասել է նախարարը։

Նրա խոսքով` Ադրբեջանի էներգետիկ քաղաքականության մասին խոսելիս առաջին հերթին անհրաժեշտ է խոսել Թուրքիայի հետ սերտ համագործակցության և համատեղ նախագծերի մասին։

Շահբազովը նշել է, որ էներգետիկայի զարգացումը ադրբեջանա-թուրքական հարաբերությունների հիմնական հենասյուներից մեկն է։

«Էներգետիկան մեր երկրների միջև ապագա համագործակցության հիմնական թեմաներից մեկն է»,- ասել է նա։

Նախարարն ընդգծել է նաև էներգետիկ ռեսուրսների փոխադրման գործում դիվերսիֆիկացման կարևորությունը։

«Մենք մտածում ենք այն մասին, թե ինչ կարող ենք անել հավասարակշռված և կայուն կերպով: Բոլորը գիտեն, որ էներգետիկ անվտանգությունը Ադրբեջանի համար անբաժանելի գործոն է։ Այժմ կարող ենք փաստել, որ տարածաշրջանում և աշխարհում քաղաքական հակամարտությունները անկայունություն են բերում գազի շուկայի համար»,- ընդգծել է Փարվիզ Շահբազովը։