Զագրեբում կոչ են արել բարձրացնել ՆԱՏՕ-ի պատրաստությունը (տեսանյութ)

Խորվաթիայի վարչապետ Անդրեյ Պլենկովիչը լրագրողներին հայտնել է, որ Զագրեբում կործանված անօդաչու թռչող սարքը կարողացել է աննկատ թռչել երեք երկրների վրայով, փոխանցում է РИА Новости-ն։

«Այն անցել է, բացի Ուկրաինայի օդային տարածքից, ռումինական, հունգարական և մտել խորվաթական, մոտ յոթ րոպե թռել Խորվաթիայի վրայով և ընկել այստեղ, որտեղ մենք ունենք 4,5 հազար ուսանող, ռեստորան, գիշերային ակումբ, ևս մեկ ռեստորան, կամուրջ Սավայի վրայով, 200 մ հեռավորության վրա գտնվող բնակելի տներ: Այս մեծ դժբախտության մեջ մեր բախտը բերել է, և ոչ ոք չի տուժել, վնասվել է 40 կայանված մեքենա»,- դեպքի վայրից ասել է Պլենկովիչը։

Վարչապետն ընդգծել է, որ այս իրավիճակը ցույց է տալիս ՆԱՏՕ-ի երկրների միմյանց հետ «սերտ համագործակցության» անհրաժեշտությունը, քանի որ սարքը հատել է դաշինքի երեք երկրների սահմանները։

«Սա պարզ և հստակ սպառնալիք է, որին պետք է ուշադրություն դարձնել, ուստի մենք կբարձրացնենք այս թեման ԵՄ և ՆԱՏՕ-ի բոլոր մարմիններում և կաշխատենք բարձրացնել մեր և բոլորի պատրաստությունը, որպեսզի նման ինքնաթիռները ոչնչացվեն անվտանգ վայրում և չթռչեն ու ընկեն քաղաքի շատ բնակեցված հատվածում»,- բացատրել է նա։

Պլենկովիչը նաև նշել է, որ ընկած անօդաչու թռչող սարքը խորհրդային Տու-141 «Ստրիժ» է, որը արձակվել է Ուկրաինայի տարածքից, սակայն դեռ չի պարզվել, թե կոնկրետ ում է այն պատկանում։

«Մենք չգիտենք, թե ում է պատկանում անօդաչու թռչող սարքը։ Հիմա, ըստ ռուսական և ուկրաինական կողմերի հայտարարությունների, բոլորն ասում են, որ իրենցը չէ, այլ մեկ ուրիշինը»,- պարզաբանել է վարչապետը։