Վրաստանի նախագահը Զելենսկիին խնդրել է Թբիլիսի վերադարձնել Ուկրաինայի դեսպանին

Վրաստանի նախագահ Սալոմե Զուրաբիշվիլին խնդրել է վերադարձնել Թբիլիսիում Ուկրաինայի արտակարգ և լիազոր դեսպանին, գրում է Новости Грузия գործակալությունը։

«Ես դիմում եմ իմ գործընկերոջն ու ընկերոջը՝ Ուկրաինայի նախագահ Վլադիմիր Զելենսկիին, և խնդրում եմ վերադարձնել դեսպանին, որպեսզի մեր երկու ժողովուրդների միջև այս դժվարին պահերին կապերը լիովին ամրապնդվեն», - ասել է Զուրաբիշվիլին։

Մարտի 1-ին Վլադիմիր Զելենսկին հայտարարեց Վրաստանից Ուկրաինայի դեսպանին խորհրդակցությունների համար հետ կանչելու մասին։ Պատճառը նա անվանել է Ուկրաինային օգնել ցանկացող կամավորներին խոչընդոտելը և Վրաստանի կառավարության «անբարոյական դիրքորոշումը»՝ կապված Ռուսաստանի դեմ պատժամիջոցների հետ։

Իշխող «Վրացական երազանք»-ն այս որոշումը որակեց «չհիմնավորված և շատ տխուր»՝ ստեղծված իրավիճակի ողջ պատասխանատվությունը դնելով ընդդիմության վրա։ Վրաստանի կառավարությունն ավելի ուշ խոստացավ, որ կշարունակի քաղաքական աջակցությունն Ուկրաինային և մարդասիրական օգնությանը՝ չնայած դեսպանին հետ կանչելուն։