Ռուսական և ուկրաինական պատվիրակությունների դիրքորոշումներում սկզբունքային հակասություններ կան․ Պոդոլյակ

Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը հայտնել է, որ Ռուսաստանի և Ուկրաինայի պատվիրակությունները բանակցությունները կշարունակեն մարտի 16-ին։ Այս մասին հայտնում է ՏԱՍՍ-ը։

«Վաղը կշարունակենք: Շատ բարդ և կոշտ բանակցային գործընթաց է: Կան սկզբունքային հակասություններ: Բայց փոխզիջման տեղ հաստատ կա»,- գրել է նա Twitter-ի իր միկրոբլոգում։

Ավելի վաղ Ուկրաինայի նախագահի աշխատակազմի ղեկավարի տեղակալ Իգոր Ժովկվան ասել էր, որ Կիևը Մոսկվայի հետ բանակցություններում փնտրում է իր համար անվտանգության երաշխիքներ։

Նրա խոսքով՝ Ռուսաստանի որոշ պահանջներ լիովին անընդունելի են, օրինակ՝ տարածքային որոշակի պահանջների հետ կապված։ Նա նշել է, որ կարելի է քննարկումներ անցկացնել այլ կետերի շուրջ, բայց միայն հաշվի առնելով ապագայում Ուկրաինայի անվտանգության երաշխիքը։

Մինչ այս Ուկրաինայի նախագահի գրասենյակի ղեկավարի խորհրդական Ալեքսեյ Արեստովիչը հայտարարել էր, որ Ռուսաստանի հետ խաղաղության համաձայնագիր կարող է ձեռք բերվել ամենաշուտը 1-2 շաբաթվա ընթացքում, իսկ ամենաուշը՝ մայիսին։

Մարտի 14-ին առցանց ռեժիմով մեկնարկել է Ռուսաստանի և Ուկրաինայի միջև բանակցությունների չորրորդ փուլը։ Ավելի ուշ Ուկրաինայի նախագահ Վլադիմիր Զելենսկու գրասենյակի ղեկավարի խորհրդական Միխայիլ Պոդոլյակը հայտնել էր, որ Ռուսաստանի հետ բանակցություններում տեխնիկական դադար է վերցվել մինչև մարտի 15-ը։