Ռուսաստանում արգելափակված «Դոժդ» հեռուստաալիքի աշխատակցին վտարել են Ղազախստանից

Ղազախստանի իշխանությունները Ռուսաստան են արտաքսել «Դոժդ» հեռուստաալիքի գրասենյակի մենեջերին, ում անունը չի հաղորդվում։ Այս մասին Տելեգրամի իր ալիքում հայտնել է «Դոժդ»-ի հաղորդավարուհի Աննա Մոնգաիթը, հաղորդում է Kaztag.kz-ն։

«Մեր գործընկերոջը՝ «Դոժդ»-ի գրասենյակի մենեջերին, Ղազախստանից վտարեցին ևս ութ ռուսների հետ, ովքեր նրա հետ նույն հյուրանոցում էին ապրում։ Համարել են «անցանկալի»։ Արտաքսել են Ռուսաստան: Նրա համար դա դրամատիկ է, բայց ոչ շատ վտանգավոր: Ինչ-որ մեկի համար սա կարող է ողբերգական հետևանքներ ունենալ»,- գրել է նա:

Մարտի 1-ին Ռուսաստանի Դաշնության գլխավոր դատախազությունը պահանջել էր արգելափակել «Դոժդ» կայքը՝ Ուկրաինայում ռուսական հատուկ գործողության մասին ոչ հավաստի տեղեկություններ տարածելու համար։ Մարտի 3-ին հեռուստաալիքի գլխավոր տնօրեն Նատալյա Սինդեեւան հայտարարեց, որ «Դոժդ»-ը դադարեցնում է իր աշխատանքը։