Պատերազմի միայն առաջին 11 օրվա ընթացքում Խարկովում զոհվել կամ վիրավորվել է 450 խաղաղ բնակիչ

«Խարկովում Ռուսաստանի զինված ուժերը անտեսում են խաղաղ բնակիչների կյանքը՝ բազմիցս հարձակվելով համայնքների վրա»,- ասել է Human Rights Watch-ի Եվրոպայի և Կենտրոնական Ասիայի տնօրեն Հյու Ուիլյամսոնը Ուկրաինայում ռուսական բանակի գործողությունների վերաբերյալ կազմակերպության զեկույցում։ Այս մասին հայտնում է BBC News ռուսական ծառայությունը իր տելեգրամյան ալիքում։ 

Ավիահարվածների և բնակավայրերի գնդակոծությունների արդյունքում զոհվել կամ վիրավորվել է ավելի քան 450 խաղաղ բնակիչ։ Հարվածներ են արձակվել բազմաբնակարան շենքերին, դպրոցներին, եկեղեցիներին և խանութներին՝ մարդկանց թողնելով առանց սննդի և դեղորայքի:

Հրթիռակոծությունը վնասել է քաղաքի ենթակառուցվածքը՝ բնակիչներին զրկելով կենսական ծառայություններից, ինչպիսիք են էլեկտրականությունը, ջերմությունը և ջուրը:

«Ռուս զինվորականները կարող են զգալ, որ իրավունք ունեն անտեսելու պատերազմի օրենքները Խարկովի վրա հարձակվելիս, սակայն մեղավորները կհետապնդվեն Միջազգային քրեական դատարանի կողմից ռազմական հանցագործությունների համար», - ասում է Հյու Ուիլյամսոնը: