Գերմանիայի էկոնոմիկայի նախարարը նախազգուշացրել է հաջորդ ձմռանը երկրում գազի հնարավոր դեֆիցիտի մասին

Գերմանիայի փոխկանցլեր, էկոնոմիկայի հարցերի և կլիմայի պաշտպանության նախարար Ռոբերտ Հաբեկը հայտարարել է հաջորդ ձմռանը Գերմանիայի գազամատակարարման հետ կապված հնարավոր խնդիրների մասին։ Այս կարծիքը նա հայտնել է շաբաթ օրը Deutschlandfunk ռադիոկայանի եթերում Կատար կատարած այցից առաջ։

«Սա նշանակում է, որ եթե մինչև հաջորդ ձմեռ մենք ավելի շատ գազ չստանանք, կամ եթե Ռուսաստանից մատակարարումները ընդհատվեն, ապա մենք այնքան գազ չենք ունենա, որ տաքացնենք բոլոր տները կամ պահենք ողջ արդյունաբերությունը»,- ասել է նախարարը։ Նա չի բացառել, որ կարող է լինել դոմինոյի էֆեկտ՝ երբ խափանում է տեղի ունենում արդյունաբերության գազի մատակարարման որոշակի փուլում, պակասը կզգացվի այլ օբյեկտներում։

«Դա ուղղակի հիմարություն էր»,- ասել է Հաբեկը` գազի ներկրումից Գերմանիայի կախվածության մասին։

Էկոնոմիկայի նախարարության ղեկավարը կայցելի Կատար, Արաբական Միացյալ Էմիրություններ, որտեղ բանակցություններ կվարի էներգակիրների մատակարարումների շուրջ։ Ավելի վաղ Գերմանիայի իշխանությունները հայտարարել էին, որ մտադիր են այս ոլորտում հասնել Ռուսաստանից կախվածության նվազմանը։