Հռոմի պապ Ֆրանցիսկոսը հռոմեական հիվանդանոցներից մեկում այցելել է ուկրաինացի երեխաներին

Հռոմի Ֆրանցիսկոս պապը շաբաթ օրը անակնկալ այց է կատարել Հռոմի մանկական հիվանդանոց, որտեղ բուժվում են վերջին շաբաթներին Ուկրաինայից տարհանված 19 երեխաներ։  Այս մասին հայտնում է Reuters գործակալությունը՝ հղում անելով Վատիկանի պաշտոնական հայտարարությանը։

 Վատիկանի մամուլի գրասենյակի հրապարակած լուսանկարներից մեկում Հռոմի պապ Ֆրանցիսկոսը զրուցում է վիրակապված գլխով և կոկորդում խողովակով մի աղջկա հետ։
Ընդհանուր առմամբ, Ուկրաինա Ռուսաստանի ներխուժման սկզբից ի վեր Բամբինո Գեսու հիվանդանոցում բուժվել է ուկրաինացի 50 երեխա։

 «Երեխաների արյունն ու արցունքները, կանանց և տղամարդկանց տառապանքը, ովքեր պաշտպանում են իրենց հողը կամ փախչում են ռմբակոծություններից, գրգռում են մեր գիտակցությունը», - ուրբաթ օրը Սլովակիայում եկեղեցական համաժողովի ժամանակ ուղերձ է հղել Հռոմի պապ Ֆրանցիսկոսը: