Վոլոդինը հայտնել է, թե որ դեպքում ՌԴ-ն միջուկային հարված կհասցնի

ՌԴ Պետդումայի խոսնակ Վյաչեսլավ Վոլոդինը Ուկրաինայի շուրջ ստեղծված իրավիճակի մասին հարցին պատասխանել է, որ Ռուսաստանի Դաշնությունը կարող է պատասխանել միայն միջուկային հարվածին, մինչդեռ «ԱՄՆ-ից ամեն ինչ կարելի է սպասել»։

Հարցին, թե Ուկրաինայի շուրջ իրավիճակը կարո՞ղ է հասնել «միջուկային կետի», Վոլոդինը պատասխանել է. «Ռուսաստանի կողմից՝ ոչ, մեր պետության կողմից ամեն ինչ պարզ է, և մենք ելնում ենք նրանից, որ դա կարող է լինել միայն պատասխան միջուկային հարվածին»,- ընդգծել է քաղաքական գործիչը «Կոմսոմոլսկայա պրավդա» ռադիոկայանի եթերում։

Ինչպես հավելել է պատգամավորը, միակ երկիրը, որը միջուկային զենք է կիրառել, ԱՄՆ-ն է, նրանք նախատեսում են կանխարգելիչ միջուկային հարված հասցնելու հնարավորությունը։

«Մենք ունենք միակ երկիրը (որը - խմբ.) միջուկային զենք է կիրառել՝ ԱՄՆ-ն, իհարկե, նրանցից ամեն ինչ կարելի է սպասել, նրանք գրավել ու ռմբակոծել են խաղաղ քաղաքները՝ Հիրոսիման և Նագասակին, օգոստոսի 6-ին և 9-ին, կլինի հերթական տարեդարձը... Որովհետև նրանք դա ունեն իրենց հայեցակարգում` կանխարգելիչ հարվածի իրավունքը: Ինչ վերաբերում է Ռուսաստանի Դաշնությանը, գիտեք, մենք դա ունենք միայն որպես հասցված հարվածին պատասխանելու հնարավորություն»,- հավելել է Վոլոդինը` ՝ պատասխանելով այն հարցին, թե ինչպես կարելի է վերաբերվել միջուկային պատերազմի հնարավորության մասին հրապարակումների ու հայտարարությունների հայտնվելուն։