Խաղաղության օրակարգը ձեռնտու է միայն Թուրքիայի եւ Ադրբեջանի կայսերապաշտական նպատակներին. հայտարարություն

Ճառագայթ ձախ խմբակցությունը ֆեյսբուքյան իր էջում հայտարարություն է տարածել, որում դատապարտել է ներկայիս իշխանությունների բռնած թուրքամետ ուղին, որն ըստ խմբակցության՝ ոտնահարում է արցախահայության ինքնորոշման իրավունքը, ինչպես նաեւ վտանգի տակ դնում Արցախի եւ Հայաստանի հանրապետության բնակչության կյանքը եւ բարօրությունը։

«Ի պատասխան խաղաղության օրակարգին

Մենք՝ Ճառագայթ ձախ խմբակցությունը, դատապարտում ենք ներկայիս իշխանությունների բռնած թուրքամետ ուղին, որը ոտնահարում է արցախահայության ինքնորոշման իրավունքը, ինչպես նաեւ վտանգի տակ դնում Արցախի եւ Հայատսանի հանրապետության բնակչության կյանքը եւ բարօրությունը։

Լինելով խաղաղության ջատագով՝ մենք հասկանում ենք, որ լիարժեք խաղաղություն հնարավոր չէ առանց պատմական արդարության վերականգնման։ Ներկայիս պայմաններում Թուրքիան եւ Ադրբեջանը ոչ միայն պատրաստակամ չեն ճանաչելու հայ, եզդի, ասորի եւ այլ ժողովուրդների ցեղասպանությունը, այլեւ պատրաստ են առաջին իսկ հնարավորության դեպքում կրկնել իրենց հանցանքը։ Հետեւաբար, այս պայմաններում արժանապատիվ խաղաղության միակ ճանապարհն այն պարտադրելն է, ոչ թե մուրալը։

Հայաստանում գործող զանազան իրավապաշտպան կազմակերպություններ, որոնք խաղաղության քարոզ են անում, իրականում չեն ներկայացնում հայ, եզդի, ասորի եւ թուրքերից տուժած այլ ժողովուրդների շահերը։ Ֆինանսավորվելով արեւմտյան ֆոնդերից՝ իրավապաշտպանների, ֆեմինիստների եւ ձախերի անվան տակ նրանք սպասարկում են արեւմտյան կապիտալի շահերին, որի մաս է կազմում Թուրքիան։ Ցուցաբերելով խիստ ընտրողական մարդասիրություն՝ նրանք կարծես չեն նկատում ներկայիս իշխանությունների հրահանգով ոստիկանական ամենաթողությունը, կատարված բռնությունները եւ ընդդիմության ներկայացուցիչների (այդ թվում՝ միայնակ մայր Էմմա Սարգսյանի) ապօրինի ձերբակալությունները։

2020 թվականի արցախյան երկրորդ պատերազմի ժամանակ եւ դրանից հետո Ադրբեջանի զինված ուժերը ֆիզիկական եւ հոգեբանական բռնության է ենթարկում Արցախի, Սյունիքի, Վայոց ձորի եւ Գեղարքունիքի բնակչությանը, ինչն անարձագանք է մնում իրենց իրավապաշտպան հռչակած կազմակերպությունների կողմից։

Ավելին՝ Թուրքիան եւ Ադրբեջանը չեն թաքցնում իրենց ցեղասպանական նպատակները։ Մասնավորապես, Ալիեւի հայտարարությունը, որ հայերը չպետք է հինգ միլիոնի հասնեն, Չավուշօղլուի՝ գորշ գայլերի նշանը ցույց տալը, Էրդողանի՝ Էնվեր փաշա ոգեկոչելը, գերիներին, այդ թվում՝ քաղաքացիական անձանց խոշտանգելով սպանելը, գազատարի անջատելը եւ այլն։

Այսպիսով, խաղաղության օրակարգը ձեռնտու է միայն Թուրքիայի եւ Ադրբեջանի կայսերապաշտական նպատակներին, որպեսզի առանց դիմադրության վերջնականապես հայաթափեն Արցախի ու Հայաստանի հանրապետությունները։ Այս օրակարգը չի բխում հայերի, եզդիների, ասորիների եւ այլ ազգային փոքրամասնությունների շահերից։

Ներկայիս իշխանությունները նաեւ ժողովրդավարության հետ ոչ մի աղերս չունեն, քանի որ ի թիվս այլ հակաժողովրդավար քայլերի, այսօր բիրտ ուժ են կիրառում ցուցարարների նկատմամբ, իրենց անցկացրած օրենքներով ճնշում են ազատ խոսքը եւ փորձում են ապօրինի ձեւերով ազդել ՏԻՄ ընտրությունների եւ դատարանների վրա։ Այս ամենը նույնպես աննկատ է անցնում իրավապաշտպան եւ ժողովրդավարության ջատագով կազմակերպությունների համար։

Հաշվի առնելով վերը նշյալը՝ հայտարարում ենք, որ ՀՀ ներկայիս իշխանությունները, ինչպես նաեւ ՀՀ-ում գործող արեւմտյան ֆոնդերից ֆինանսավորվող հասարակական կազմակերպությունները չեն ներկայացնում Հայաստանի եւ Արցախի ժողովրդի շահերը, սպասարկում են անարդարությանը նրանց նկատմամբ։ Հետեւաբար, մեր աջակցությունն ենք հայտնում դիմադրության շարժմանը եւ զորակցում ենք թուրքական ծավալապաշտության դեմ պայքարող քաղբանտարկյալներին։

Դիմադրության շարժմանը կոչ ենք անում անդրադառնալ նաեւ սոցիալական հարցերին եւ սոցիալական արդարության օրակարգ առաջ քաշել։ Արժանապատվության վերականգնումը ոչ միայն «առանց թուրքի Հայաստանով» է հնարավոր, այլեւ անվճար ու որակյալ բուժօգնությամբ ու կրթությամբ, ապահով ծերությամբ ու մայրությամբ, աշխատավորների իրավունքների պաշտպանությամբ։

Մենք վստահ ենք, որ արդար, ընկերվարական եւ ժողովրդավար Հայաստանում, որտեղ յուրաքանչյուր հայ եւ ազգային փոքրամասնության ներկայացուցիչ կարող է բարեկեցիկ ապրել, արարել եւ պաշտպանել իր երկրի սահմանները, օտարերկրյա շահերին սպասարկող ուժերն իշխանությունը զավթել չեն կարողանա»,– ասվում է հայտարարության մեջ։

Ճառագայթ ձախ խմբակցություն

Բյուրակն Իշխանյան

Եվա Հակոբյան

Սօսէ Յովսէփեան

Անի-Ծովինար Վանեցյան