Փաշինյանն առաջ է մղում Տիգրան Սարգսյանի և Կարեն Կարապետյանի խորհրդականի բիզնեսը

Սույն թվականի օգոստոսի 3-ին կկայանա «Ատ-Մետալս» ՍՊԸ-ի՝ Սյունիքի մարզի Մեղրասարի ոսկու հանքավայրի բաց եղանակով մշակման շրջակա միջավայրի վրա ազդեցության գնահատման հաշվետվության վերջին՝ 4-րդ հանրային քննարկումը, հաղորդում է «ԷկոԼուր»-ը: «Ատ-Մետալս» ՍՊԸ-ն հանքավայրի ընդերքօգտագործման թույլտվությունը ստացել էր 2014թ-ին՝ 7․5 տարի ժամկետով, որը լրացել է 2021թ-ի հուլիսին։ Կարճ ժամանակահատված հանքի և գործարանի շահագործումից հետո՝ 2015թ-ին, աշխատանքները դադարեցվել էին: Ըստ Հայաստանի Արդյունահող ճյուղերի թափանցիկության նախաձեռնության կայքում հրապարակված ընկերության հաշվետվությունների՝ «Ատ-Մետալս»-ը 2016 և 2018 թթ-ին հանքը չի շահագործել, իսկ 2017թ-ին ընկերության արտադրության ծավալը կազմել է 14257 տոննա, 2019թ-ին՝ 10811 տոննա։

Ուշագրավն այս պատմության մեջ այն է, որ Մեղրասարի ոսկու և արծաթի հանքավայրը շահագործող ընկերության սեփականատերերից մեկը ՀՀ վարչապետի խորհրդական Համլետ Հովսեփյանն է: Նա և իր որդիները մեծ բաժնեմաս ունեն «ԱՏ-Մետալս» ՍՊԸ-ում: Այս ընկերությունը հանքավայրի շահագործման իր ծրագիրն բազմաթիվ խախտումներով է սկսել, որոնց մամուլը բազմիցս անդրադարձել է: Անցյալ տարվա հուլիսին ՀՀ բնապահպանության նախարարությունը Սյունիքի տարածքային բաժնի կողմից հայտնաբերված ապօրինի շինարարության համար «ԱՏ-մետալս» ՍՊԸ-ի  նկատմամբ կայացրել էր ընկերության գործունեության դադարեցման որոշում, քանի որ ընկերությունը սկսել էր փորձարարական համալիր կառուցել՝ չունենալով բնապահպանական փորձաքննության եզրակացություն: Սակայն որևէ այլ պատասխանատվության ՍՊԸ-ն չէր ենթարկվել:

Ավելին` հեղափոխությունից հետո «Ատ-մետալս» ընկերությունը դատարանում պարտվել է Մեղրի համայնքին։ Հովսեփյանների ընկերությունը վարչական դատարան էր դիմել՝ պարտավորեցնելու Մեղրիի համայնքապետին ընդունել մոտ 39 հեկտար մակերեսով հողամասի նպատակային նշանակությունը՝ դարձնելով արդյունաբերական, ընդերքօգտագործման։ Այդ հատվածում «Ատ-մետալս»-ը նախատեսում է ոսկու արդյունահանում իրականացնել։ Մեղրիի ավագանին դեմ է հանդես եկել հողերի նշանակությունը փոխելուն։ Մայիսի 4-ին դատավոր Արթուր Ծատուրյանը մերժել է հայցը։ Բայց, ինչպես տեսնում ենք, կառավարությունը չի թողնում փորձերը՝ համոզելու համայնքին համաձայնվել ընկերության կողմից հանքի շահագործմանը: Հետաքրքիր է՝ բաց հանքերի դեմ հանդես եկող, մշտապես պաշտոնյաների հետ փոխկապակցված բիզնեսներն առաջ մղելը պախարակող Փաշինյանն ու թիմը ինչո՞ւ են այսքան լոյալ գտնվում նախկին վարչապետերի խորհրդականի ընտանեկան բիզնեսի հանդեպ...