Պաշտոնը՝ հանուն ընտանեկան բիզնեսի բարգավաճման. ով ինչպես է օգտվում պետական բյուջեից

Օրեր առաջ հայտնի է դարձել, որ Վայոց ձորի մարզի Վայք համայնքի ղեկավար Մխիթար Մաթևոսյանն ընդհանուր 537 միլիոն դրամի պայմանագրեր է կնքել իր կնոջը պատկանող ընկերության հետ, ընդ որում՝ մինչև 2022 թվականն այդ ընկերությունը ղեկավարել է հենց ինքը՝ Մխիթար Մաթևոսյանը, սակայն համայնքի ղեկավար ընտրվելուց հետո ընկերության իր բաժնեմասն ու կառավարումը հանձնել է կնոջը՝ Մերի Մարգարյանին։ Պետական գնումների armeps.am համակարգի տվյալներով՝ 2022 թվականի ընթացքում Վայքի համայնքապետարանը՝ ի դեմս Մխիթար Մաթևոսյանի, 4 պայմանագիր է կնքել «Մավշին» ՍՊԸ-ի հետ։ Իսկ ամենախոշոր պայմանագիրը Վայքի համայնքապետարանի և «Մավշին» ՍՊԸ-ի միջև կնքվել է մեկ շաբաթ առաջ՝ օգոստոսի 4-ին։ Համայնքապետի կնոջ ընկերությունը համայնքային բյուջեից մոտ 405 միլիոն դրամ կստանա Վայք քաղաքի Շահումյան փողոցն ասֆալտապատելու համար։

Թեև Նիկոլ Փաշինյանը խոստանում էր ի սպառ վերացնել այս երևույթը, որը, նրա խոսքով, ոչ այլ ինչ էր, քան կոռուպցիայի անթաքույց դրսևորում՝ նրա ղեկավարած երկրում այդ դրսևորումները նոր թափ են հավաքում:

Դիցուք՝ Վայքի համայքնապետը այս ցանկում միակը չէ: Նմանատիպ իրավիճակ է նաև Ջերմուկում: Այս համայնքում շինարարական աշխատանքները իրականացնում է հենց համայնքապետ Վահագն Արսենյանի ընտանիքին պատկանող «Ջերմուկ Գրուպ»-ը` իր ֆինանսական միջոցներով։ Դիցուք` Ջերմուկում կկառուցվի նոր բնակելի թաղամաս՝ բաղկացած մոտ 300 բնակարանից։ Ծրագրի նախագիծը արդեն կա, իսկ կառուցապատման աշխատանքների մեկնարկը կտրվի 2022 թվականի մայիս ամսից։ Ծրագիրը իրականացվում է «Ջերմուկ Գրուպ» ընկերության կողմից։ Բացի այդ, վերանորոգվում է նաև «Ջերմուկ Գրուպ» ընկերության կողմից գնված Ջերմուկի «Գլաձոր» առողջարանը, որը, արդեն երկար տարիներ է, ինչ աշխատում է մասամբ և սեզոնային։ Այսինքն ակնհայտ է, որ ենթակառուցվածքների մասով շարժ կա, սակայն ուշագրավ է, որ կիզակետում է հենց «Ջերմուկ Գրուպ»-ը:

Առողջապահության նախարար Անահիտ Ավանեսյանի ամուսնուն պատկանող «Արմֆարմացիա» ընկերու­թյունը վերջին տարիներին կնքել է 240 պայմանագիր 44 պետական կառույցի հետ, ընդհանուր՝ մոտ 606,7 մլն դրամ ար­ժողությամբ, որի կեսից ավելին՝ 137 պայ­մանագիրը, արդեն Ավանեսյանի փոխնա­խարար եղած ժամանակ: 209,5 մլն ՀՀ դրամի պայմանագրեր ունի տարբեր պետական կառույցների, այդ թվում՝ Առող­ջապահության նախարարության և նրա ենթակայության տակ գտնվող կառույցնե­րի հետ: Պայմանագրերի մոտ 43%-ը (262 մլն դրամ) կնքվել է Առողջապահության նախարարության հետ: Ինքը՝ Ավանեսյանը, մինչ նախարար նշանակվելը եղել է նույն «Արմֆարմացիայի» ղեկավարը: Այ­սինքն՝ ակնհայտորեն այսօրվա նախարա­րը իր փոխնախարարի կարգավիճակը և ամուսնու ընկերոջ հնարավորությունները օգտագործել է, որպեսզի ընտանեկան բիզնեսները զարգացնի:

Կոռուպցիայի կանխարգելման հանձնաժողովը իրավիճակային շահերի բախման առերևույթ դեպքի հիմքով վարույթ է հարուցել Առողջապահության արդեն նախկին նախարար Արսեն Թորոսյանի նկատմամբ։ Վարույթի հիմք է հանդիսացել data.hetq.am-ի գրությունը։ Առողջապահության նախարարությունը ծառայությունների մատուցման պայմանագրեր էր կնքել «Միբս» ընկերության հետ, որի տնօրենը նախարար Արսեն Թորոսյանի կինն է՝ Վարդանուշ Թևանյանը։ Այդ պայմանագրերով «Միբս» ընկերությունը պարտավորվել է մատուցել հիվանդանոցային ծառայություններ, Էլեկտրոնային առողջապահական ծախսերի փոխհատուցում, համակարգչային տոմոգրաֆիայի ծառայություն։ 

Վարչապետի աշխատակազմի ղեկավարի տեղակալ Բագրատ Բադալյանի ընկերությունը խոշոր՝ 834 000 դոլարի պետական պատվերներ է ստացել մեծամասամբ տարածքային կառավարման և ենթակառուցվածքների նախարարությունից, որտեղ ավելի վաղ նա եղել է փոխնախարար։ Պայմանագրերը նրա ընկերության հետ կնքվել են մեկ անձից ընթացակարգով՝ առանց մրցույթի: Համեմատության համար նշենք, որ նախկինում Բագրատ Բադալյանին պատկանող այս ընկերությունը 2015 թվականին կարողացել է կնքել ընդամենը 4 գնման պայմանագիր, իսկ ահա նրա՝ պաշտոնյա դառնալուց հետո այդ պայմանագրերի թիվը բազմապատկվել է. 2021-2022 թվականներին կնքել է 1 միլիոն 400 հազար դոլարի շուրջ 2 տասնյակ պայմանագիր։ Հիշեցնենք, որ «Ճաննախագիծ» ՍՊԸ-ն հիմնադրվել է 1995-ին, մինչև 2020-ը ընկերության գլխավոր բաժնետերը եղել է Սամվել Բադալյանը՝ Բագրատ Բադալյանի հայրը։ 2019 թվականին հայրն իր բաժնեմասը՝ 88.13%-ը, փոխանցել է որդուն, որն էլ դա հավատարմագրային կառավարման է հանձնել կնոջը՝ Մարգարիտա Ագանիսյանին։

Ինչպես հասկանում ենք՝ Նիկոլ Փաշինյանի հավաստիացումը, որ հեղափոխությունից հետո պաշտոնյաները կդադարեն, օգտագործելով իրենց պաշտոնական դիրքը, ծաղկեցնել սեփական բիզնեսները, նույնպես գրվեց սառույցին...