Մոսկվան ինչ-որ առումով ճիշտ է, երբ բրյուսելյան գործընթացը համարում է «կեղծ նախաձեռնություն»․ Սուրեն Սուրենյանց

Փաշինյանի բրյուսելյան վերջին այցը լակմուսի թուղթ էր․ Ռուսաստանը «խանդով» արձագանքեց ու Եվրոպային մեղադրեց ոչ բարի նպատակների ու ղարաբաղյան հակամարտության հարցով Մոսկվայի հաջողությունները յուրացնելու փորձի մեջ, Փաշինյանը խոստովանեց, որ բարդ քննարկում է եղել, առկա խնդիրների լուծումները տակավին ակնհայտ չեն, բայց Երևանը հավատարիմ է խաղաղության օրակարգին, իսկ հայաստանյան ընդդիմադիր հայտնի շրջանակները Փաշինյան-Ալիև-Միշել հանդիպումը համարեցին Հայաստանի ու Արցախի շահերի դեմ հերթական դավադիր բանակցություններ։ 

«Շառլ Միշելը նախօրեին ասել է, որ կողմերը արտգործնախարարներին հանձնարարել են մեկ ամսվա ընթացքում հանդիպել՝ աշխատելու տեքստի նախագծի վրա։ Սա, թերևս, օգոստոսի 31-ի հանդիպման հիմնական արդյունքն է, սակայն այստեղ էլ առաջանում են բազմաթիվ հարցեր՝ արդյո՞ք հայ-ադրբեջանական հարաբերությունները ու հաշտեցման գործընթացը տարանջատվում է ԼՂ խնդրից, այդ մասին հիշատակում լինելո՞ւ է պայմանագրում, թե՞ ոչ»:

ԼՈՒՐԵՐ․com-ի հետ զրույցում նման տեսակետ հայտնեց քաղաքագետ, «Դեմոկրատական այլընտրանք» կուսակցության նախագահ Սուրեն Սուրենյանցը։ Նրա պնդմամբ, մյուս խնդիրն այն է, որ բրյուսելյան գործընթացը Մոսկվայի կողմից որակվում է «կեղծ նախաձեռնություն»: 

«Ամբողջ խնդիրն այն է, որ չնայած կոշտ հռետրորաբանությանը՝ Մոսկվայում ինչ-որ իմաստով ճիշտ են, որովհետև Բրյուսելում, ըստ էության, պայմանավորվածությունները վերաբերում են օրակարգի, որի թիվ մեկ շահառուն այս պահին Ռուսաստանն է: Ու պատահական չէ, որ օգոստոսի 31-ին՝ չնայած բոլորի ուշադրությունը սևեռված էր Բրյուսելին, ավելի առարկայական հայտարարություն հնչեց Մոսկվայից»,-ընդգծեց մեր զրուցակիցը: 

Սուրենյանցը հիշեցրեց ՌԴ ԱԳ նախարար Սերգեյ Լավրովի այն հայտարարությունը, թե Ռուսաստանի, Հայաստանի և Ադրբեջանի փոխվարչապետերից կազմված եռակողմ աշխատանքային խումբը զգալի առաջընթաց է արձանագրել Հարավային Կովկասում տրանսպորտային ուղիների վերաբացման խնդրի շուրջ։

«Լավրովը նաև հույս հայտնեց, որ «ամենամոտ ապագայում աշխատանքային խմբերի միջև ձեռք բերված պայմանավորվածությունները կձևակերպվեն»։ Ակնհայտորեն՝ կոմունիկացիաների ապաշրջափակման կամ Սյունիքով նախատեսվող ճանապարհի գործընթացը սերտորեն կապված է Ադրբեջանի «եվրասիական» ակտիվացման հետ: Դժվար է ստույգ կանխատեսումներ անելը, բայց ենթադրում եմ, որ առաջիկա ամիսներին Փաշինյանն ու Ալիևը՝ Մոսկվայի միջնորդությամբ, կարող են փաստաթուղթ ստորագրել կոմունիկացիաների ապաշրջափակման կոնկրետ համաձայնությունների մասին»,-նշեց քաղաքագետը:

Ինչ վերաբերում է խաղաղության գործընթացին, Սուրենյանցը նկատեց, որ այն ավելի բազմաշերտ գործընթաց է ու ենթադրելի է, որ կարող է մի քանի տարի ձգվել:

Արա Ալոյան