ՔՊ-ական քաղաքապետերի ունեցվածքը՝ հեղափոխությունից առաջ և այսօր

Էջմիածնի և Արմավիրի քաղաքապետերի պաշտոնները զբաղեցնող Դիանա Գասպարյանի և Դավիթ Խուդաթյանի կյանքում հեղափոխությունից հետո կտրուկ փոփոխություններ են տեղի ունեցել: Այդ մասին է վկայում վերջիններս ներկայացրած հայտարարագրերի ուսումնասիրությունները: Մեկ հայացքը ներկայացված փաստաթղթերին բավարար է, որպեսզի հասկանալի դառնա, թե ինչ էվոլյուցիա է ապրել վերջիններիս սոցիալական դրությունը պաշտոնը ստանձնելու օրվա դրության համեմատ:

2018 թվականին Դիանա Գասպարյանը հայտարարագրել էր ընդամենը 100 հազար դրամի հավասար դրամական միջոց: Նրա եկամուտը պաշտոնը ստանձնելու օրվա դրությամբ կազմել է 1,695,517.00 դրամ: 2018-ի տարեկան հայտարարագրում որոշակի փոփոխությունները արդեն իսկ ակնհայտ էին դառնում: Գասպարյանը հայտարարագրել էր 200,000.00 դրամ դրամական միջոցներ, իսկ եկամուտները կազմել էին 3,245,422.00 դրամ: 2019-ին բանկային հաշվի մնացորդը կազմել է 348,449.00 դրամ,  կանխիկ դրամը՝ 200,000.00 դրամ, իսկ եկամուտները` 3,447,049.00 դրամ: 2020-ին Գասպարյանը հայտարարագրել է 1,000,000.00 դրամի կանխիկ գումար, 4,814,770.00 դրամ եկամուտ: 2021-ին կանխիկ դրամը կազմել է 700,000.00 դրամ, եկամուտները՝ 4,907,152.00 դրամ, ստացված փոխառությունները՝ 5,000,000.00 դրամ:

Դավիթ Խուդաթյանը 2018-ին պաշտոնը ստանձնելիս հայտարարգրել էր OPEL ASTRA CABRIO մակնիշի ավտոմեքենա և 4,000,000.00 դրամի հավասար դրամական միջոցներ: Պաշտոնյայի տարեկան հայտարարագրում տեսնում ենք նույն 4,000,000.00 դրամը, սակայն ավտոմեքենայի մասին որևէ տեղեկություն չկա: 2019-ին Խուդաթյանը ձեռք  է բերել բնակարան Երևանի Քանաքեռ-Զեյթուն վարչական շրջանում: 13,500.00 ԱՄՆ դոլարով էլ վաճառել է հողամաս: Սակայն, այդ գումարի մասին մինչ այդ տարվա հայտարարագիրը որևէ նշում չկար: Նույն թվականին Խուդաթյանը ձեռք է բերել TOYOTA մակնիշի ավտոմեքենա: Ստացած և հանձնված փոխառությունները կազմել են 22,000,000.00 դրամ: Կանխիկ դրամը՝ 3,000,000.00, իսկ ահա եկամուտների մասին ոչ մի խոսք: 2020-ին Խուդաթյանի եկամուտները կազմել են 4,800,017.00  դրամ, այլ եկամուտները՝ 1,093,112.00 դրամ: 2021-ին քաղաքապետը հայտարարագրել է 4,100,000.00 կանխիկ դրամ,  7,076,648.00 դրամի եկամուտ:

Ինչպես տեսնում ենք՝ անգամ եթե Էջմիածնի և Արմավիրի բնակիչների սոցիալ-տնտեսական վիճակը հեղափոխությունից հետո կտրուկ աճ չի արձանագրել, նույնը չենք կարող ասել այդ համայնքների ղեկավարող ՔՊ-ական պաշտոնյաների ֆինանսական դրության մասին: Հեղափոխությունից վերջիններս միանշանակ շահած են դուրս եկել...