Ալիևը «հասել» է Գյումրի՞. ինչ ապագա են «գծել» քաղաքի համար ՔՊ-ականները

Շիրակի մարզպետարանի կայքէջում ներկայացվել է Գյումրի քաղաքի զարգացման հնգամյա պլանը: Իհարկե, դժվար է հասկանալ, թե հատկապես ինչ տարեգրության և պատմական փաստերի վրա են հիմնվել սույն շեդեվրի հեղինակները, սակայն պարզից էլ պարզ է, որ որոշ բացահայտումներ, որոնք ունակ են շոկի ենթարկելու քիչ թե շատ պատմությանը ծանոթ մարդկանց, նրանք արել են:

Դիցուք՝  պարզվում է, Գյումրին իր անվանումը վերցրել է Ախուրյան գետի Գյումրիգետ վտակի անվանումից, որը հոսում է համայնքից ոչ հեռու: Համացանցում որևէ տեղ նման տեղեկատվություն, իհարկե, չես գտնի, սակայն գրողները վստահաբար մի բան գիտեին, եթե գրում էին:

Բացի այդ, պարզվում է, որ 1840թ. Ալեքսանդրապոլը պաշտոնապես դարձել է քաղաք, իսկ 1850թ. դարձել է Էրիվանի գավառի Ալեքսանդրապոլի շրջանի կենտրոն:  Այսինքն՝ Երևանի նահանգը, այս տեքստը գրողների թեթև ձեռքով ,ոչ միայն գավառ է դարձել, այլ նաև Էրիվան։ Իսկ Ալեքսանդրապոլի գավառը վերածվել են շրջանի։ Անհասկանալի է, թե որտեղի՞ց են վերցրել նման տեղեկություն, նույնիսկ Google-ը նման տեղեկություն չի բերում։

Մեկ այլ աբսուրդային հայտնագործություն՝  Գյումրու պատմաճարտարապետական 5 հուշարձանների շարքում սույն տեքստի հեղինաները դասել են գերմանացի ռազմագերիների գերեզմանոցը, թերևս տեքստի հեղինակները բավական էկզոտիկ պատկերացում ունեն պատմաճարտարապետական հուշարձանների մասին, եթե 7-րդ դարի կոթողների հետ նույն շարքում գերեզմանոցն են դասում:

Ծրագիրը կազմողները էլ ավելի հեռու են գնացել, և ռուսական ռազմաբազայի առկայությունը այս փաստաթղթում ներկայացրել են, թե՛ որպես օգուտ, թե՛ որպես սպառնալիք։ 

Անշուշտ, դժվար է հասկանալ, թե ինչով են մոտիվացվել սույն շեդեվրը հանրության դատին ներկայացնողները, սակայն ակնհայտ է, որ մարզի և քաղաքի պատասխանատուները որևէ պատկերացում չունեն այն քաղաքի մասին, որը պատրաստվում են զարգացնել...