Երբ են իրավապահները գնալու հանցագործության մասին տասնյակ հաղորդումների հետևից

Վերջին շաբաթների ընթացքում Հայաստանի հանրային դաշտում հնչել են մի շարք ուշագրավ հայտարարություններ, որոնք ոչ այլ ինչ էին, քան հանցագործության մասին հաղորդումներ: Դրանց հեղինակները ինչպես նախկին, այնպես էլ գործող իշխանության ներկայացուցիչներն էին, սակայն երկու դեպքում էլ պատկան մարմինները զարմանալիորեն նախընտրել են չտեսնելու և չլսելու տալ այդ մեղադրանքները, ինչը ինքնին բազմաթիվ հարցեր է ծնում:

Դիցուք՝ ArmLur.am-ի բացառիկ տեղեկությունների համաձայն` «Հայանտառ» ՊՈԱԿ–ի «Սիսիանի անտառտնտեսություն» մի խումբ աշպատակիցները հանցագորության մասին հաղորդում են ներկայացրել ոստիկանություն եւ խնդրել են իրենց օգնել: Ըստ աշխատակիցների՝ տնօրեն Տիգրան Համբարձումյանը սպառնացել են իրենց դիմում գրել, եթե ոչ նա իր ձեւերով կանի: Ի դեպ օգոստոսին «Հյանտառ» ՊՈԱԿ–ի «Սիսիանի անտառտնտեսության» տնօրեն է նշանակվել Տիգրան Համբարձումյանը, ով ՔՊ–ական սիսիանցի պատգամավոր Կարեն Համբարձումյանի հարազատ եղբայրն է:

«Այս իշխանությունների պատճառով մարդիկ կան, որոնք մաքրվում են իրավական գործընթացներից, պետք է սա թույլ չտալ: Ցավոք, ես հիմա արտաքին քաղաքականության մեջ եմ ներգրավված, ներքաղաքական չէ իմ գործառույթը, թե չէ լուրջ պրոբլեմներ կարող է իրենք ունենային»,- այս մասին Հաղթանակի զբոսայգում լրագրողների հետ զրույցում ասել էր ՀՀ հատուկ հանձնարարություններով դեսպան Էդմոն Մարուքյանը։ Ի՞նչ էր սա, եթե ոչ հանցագործության մասին հաղորդում վարչապետ Նիկոլ Փաշինյանի դեմ:

«Ֆիդայիներ» ՀԿ նախագահ Սեյրան Չիլինգարյանը ֆեյսբուքյան իր էջում դժգոհել էր, որ ազատամարտիկների համար Ֆրանսիայից դեղեր են ուղարկել, սակայն մաքսակետում խնդիրներ են ստեղծում։ Այս մեղադրանքն էլ իր հերթին ուղղված էր ՊԵԿ ղեկավարությանը: Ըստ էության, Սփյուռքից եկող օգնությունը անցնում էր նաև Սփյուռքի հարցերով գլխավոր հանձնակատարի գրասենյակով, առնվազն կազմակերպչական հարցերը այստեղ ևս պատշաճ  լուծում  չեն ստացել, և Սփյուռքի դժգոհությունը Զարեհ Սինանյանից նույնպես փոքր չէ:

Մամուլը նաև գրել էր,  որ Էդուարդ Աղաջանյանը Անդրանիկ Քոչարյանի և Հակոբ Արշակյանի հետ Կառավարության հաշվից կանխիկացրել էին Համահայկական hիմնադրամի 11 միլիոն դոլար գումարը, իբր պատերազմի կարիքների համար, սակայն ոչ ապրանքներն են տեղ հասել, ոչ գումարը կա մինչ օրս։

Բավականին ուշագրավ ուղերձով էր հանդես եկել ԳՇ արդեն նախկին պետ Օնիկ Գասպարյանը: Նա, մասնավորապես, հայտնել էր, որ պատերազմի չորրորդ օրն Անվտանգության խորհրդի նիստի ժամանակ ռազմաքաղաքական ղեկավարությանն է ներկայացրել մեր կորուստները և ստեղծված իրադրության վերաբերյալ զինված ուժերի գնահատականը՝ նշելով, որ 2-3 օրվա ընթացքում անհրաժեշտ է միջոցներ ձեռնարկել պատերազմը կանգնեցնելու համար, հակառակ դեպքում՝ այս ինտենսիվությամբ վարվող մարտական գործողությունների պարագայում մեր ռեսուրսները սեղմ ժամկետում կսպառվեն։ Ավելին՝ ԱԽ՝ դեռևս հունիսին կայացած նիստի ժամանակ, Օնիկ Գասպարյանը զգուշացրել էր, որ ստեղծված պայմաններում պետք է անել հնարավորը, որպեսզի, եթե նույնիսկ պատերազմը չկանխվի, ապա հնարավորություն ստեղծվի պատերազմն արագ կանգնեցնել՝ «հաշվի առնելով մեր պաշարների առկայությունը»։ Փաստորեն, ստեղծված բարդ իրավիճակն էր պատճառը, որ դեռևս հուլիս-օգոստոս ամիսներին զինված ուժերի ԳՇ-ի կողմից շրջանառության մեջ դրվեց աշխարհազորայինի ստեղծման հարցը, ինչը, չնայած սկզբնական շրջանում ակտիվ քննարկվեց, սակայն այնուհետև իշխանությունների կողմից մղվեց երրորդական պլան և մինչև պատերազմ այդպես էլ չընդունվեց։  Փաստացի, ԳՇ պետի զեկույցը ոչ այլ ինչ է, քան հանցավոր անգործունեության մասին հաղորդում: Սակայն, չգիտես ինչու, այս հայտարարությունները դեռևս քննության չեն առնվել: 

ԱԳՆ նախկին ղեկավար Արա Այվազյանը նույնպես փաստացի հանցագործության մասին հաղորդում էր ներկայացրել, երբ հայտարարել էր, որ իր հրաժարականի հիմքում նաև՝ պետականության դեմ ուղղված քայլերին չմասնակցելու ցանկությունն է: Այսինքն, ըստ Այվազյանի, Նիկոլ Փաշինյանը պետականության դեմ ուղղված քայլեր է իրականացրել:

Դիցուք՝ Նիկոլ Փաշինյանը վերջերս ընդունել է, որ իշխանություններն արդեն ի վիճակի չեն ապահովել ՀՀ Սահմանադրությամբ, կոնվենցիաներով երաշխավորված մարդու կյանքի իրավունքը երաշխավորելու պետության միջազգային պարտավորությունները՝ հայտարարելով, որ կան դեպքեր, երբ անձը մահացել է, քանի որ նա չի տեղափոխվել վերակենդանացման բաժանմունք, չնայած՝ այդ միջոցով հնարավոր էր փրկել նրա կյանքը: Այսպիսով, Փաշինյանը հանցագործության մասին հաղորդում է ներկայացրել  առողջապահության նախարարի դեմ: Ընթացք տրվե՞լ է վարչապետի այս հայտարարությանը, իհարկե, ոչ: 

Նույն Նիկոլ Փաշինյանը օրեր առաջ  ԱԺ–ում հայտարարել էր, որ Վարդան Օսկանյանն ու Ռոբերտ Քոչարյանն են Ղարաբաղը ճանաչել Ադրբեջանի մաս։ Ըստ, էության նա, նրանց մեղադրում էր պետական դավաճանության մեջ:

Իշխանության տարբեր շրջանակներ էլ հրապարակային հայտարարում էին, որ ԱԱԾ նախկին պետ Արթուր Վանեցյանը կարող է այլ երկրի հատուկ ծառայության գործակալ լինել: Բացի այդ, հնչում էին կարծիքներ, որ վերջինս երկրում հեղաշրջում էր նախապատրաստում և դրանով է պայմանավորված իր հրաժարականը: Ի՞նչ է սա, եթե ոչ հաղորդում հանցագործության մասին: Սակայն, անգամ այս հայտարարությունների հետքերով պատկան մարմինները չգնացին:

Գյումրու ավագանու ՔՊ-ական արդեն նախկին անդամ, Շիրակի մարզպետ Նազելի Բաղդասարյանի եղբայրը՝ Արման Բաղդասարյանը քաղաքապետարանի դեմ հաղորդում է ներկայացրել հանցագործության մասին: Նրա թիրախում մեկ այլ ՔՊ-ական Դավիթ Առուշանյանն էր, ով բարեհաջող կերպով պատգամավորի մանդատ է պատրաստվում ստանձնել:

Վերը նշված մեղադրանքներից և ոչ մեկը այդպես էլ չարժանացավ պատկան մարմինների ուշադրությանը, չնայած, անշուշտ, այս մեղադրանքները բավական լուրջ են և առնվազն պետք է ուսումնասիրվեին: Հակառակ դեպքում՝ պատկան մարմինների լռությունը ստիպում է մտածել, որ կամ մեղադրանքներն են բացահայտ կեղծ, կամ առկա են ինչ-ինչ ստվերային պայմանավորվածություններ և դրանք ընդամենը քաղաքական առևտրի տարրեր են...