Բլե՞ֆ, թե սուտ մատնություն. Փաշինյանի թիմակիցների «ջրված» մեղադրանքները

Հեղափոխությունից հետո ՔՊ-ական մի շարք պաշտոնյաներ հրապարակավ հնչեցրել են այնպիսի հայտարարություններ և մեղադրանքներ, որոնք իրենց մեջ հանցագործության մասին հաղորդումներ էին պարունակում: Դրանք ուղղված էին ինչպես նախկին պաշտոնատար անձանց, այնպես էլ առանձին պետությունների դեմ, սակայն մինչ օրս չեն ապացուցվել:

Իհարկե, այս հարցում, ինչպես և մյուս հարցերում, գլխավոր դերում է վարչապետ Նիկոլ Փաշինյանը: Վերջինիս մի շարք հայտարարություններ պատերազմից հետո անչափ ռեզոնանսային էին, մասնավորապես՝ Իսկանդեր մարտավարական համակարգի փաստացի խոտանված լինելու, բանակում հրթիռների միջից պլատաներ հանելու և վաճառելու, Հայաստանում օտարերկրյա գործակալների մասին պնդումները; Դիցուք՝ Նիկոլ Փաշինյանը հայտարարում էր, որ  Սերժ Սարգսյանը խաղատներում պարտվում է մեր երկրի բյուջեն՝ մսխելով մեր պետականությունը: Հովիկ Աբրահամյանին Նիկոլ Փաշինյանը մեղադրում էր ապօրինի հարստացման մեջ և առաջարկում էր Մոնումենտի դղյակները դարձնել թանգարան, որտեղ վարչապետը կաշխատի որպես գիդ: Սերժ Սարգսյանի եղբորը՝ Սաշիկ Սարգսյանին, Փաշինյանը մեղադրում էր Հայաստանում գոյություն ունեցող բոլոր քիչ թե շատ խոշոր բիզնեսին փայ մտնելու մեջ, բացի այդ, ըստ Փաշինյանի, նրան էր պատկանում արագաչափերի բիզնեսը: ԳՇ նախկին պետ Օնիկ Գասպարյանին Նիկոլ Փաշինյանը մեղադրում էր Շուշին հանձնելու մեջ: Այս մեղադրանքներից և ոչ մեկը մինչ այս պահը չեն հաստատվել:

Ամիսներ առաջ Երևանի ընդհանուր իրավասության դատարանը՝ նախագահությամբ դատավոր Սարգիս Երիցյանի, բավարարել է Սերժ Սարգսյանի փեսա Միքայել Մինասյանի հոր՝ Արա Մինասյանի հայցն ընդդեմ առողջապահության նախարար Արսեն Թորոսյանի ու նախարարության՝ պարտավորեցնելով Թորոսյանին ներողություն խնդրել ու հերքել զրպարտություն համարվող տվյալները։ Սակայն, Արսեն Թորոսյանը, ինչպես երևում է, իրեն օրենքից վեր է դասել և հրաժարվել է կատարել դատարանի վճիռը։

Դատարանը նմանատիպ որոշում կայացրել էր նաև ՍԴ նախկին նախագահ Հրայր Թովմասյանի մասով` պահանջելով Փաշինյանից ներողություն խնդրել վերջինիս հայտնի գրիչի թեմայով զրպարտելու համար։ Երկու դեպքում էլ Փաշինյանը իրեն օրենքից վեր է դասել և չի կատարել դատարանի որոշումը։

ՀՀ շրջակա միջավայրի նախկին նախարար, պետական վերահսկողական ծառայության ղեկավար Ռոմանոս Պետրոսյանը պարտվել է դատարանում: Կհիշեք՝ 2021 թվականին, երբ ՇՄ նախարարը Ռոմանոս Պետրոսյանն էր, Իջևանի դենդրոպարկի տնօրեն Մեխակ Սայադյանին ազատեց աշխատանքից: Ռոմանոս Պետրոսյանի ղեկավարած նախարարության հիմնավորումն այն էր, որ Իջևանի դենդրոպարկի տնօրեն Մեխակ Սայադյանի նկատմամբ վստահությունը կորել է: Սրանից հետո Իջևանի դենդրոպարկի նախկին տնօրեն Մեխակ Սայադյանը դիմել էր վարչական դատարան՝ վիճարկելով իրեն դենդրոպարկի տնօրենի պաշտոնից ազատելու հրամանի օրինականությունը:

Ամիսներ առաջ, երբ տեղեկություն տարածվեց, որ Ադրբեջանից հայ ռազմագերիների խումբ է ժամանելու Հայաստան, հետագայում պարզվեց, որ ինքնաթիռը վայրէջք է կատարել առանց գերիների։ Ձևավորված ավանդույթի համաձայն՝ ՔՊ-ականները սկսեցին իրենց ապաշնորհությունը բարդել այլոց վրա, այս անգամ էլ թիրախում Ռոբերտ Քոչարյանն էր։ Փաստորեն, իշխանությունները չկարողացան գերիներ բերել Հայաստան, իսկ դրա համար մեղավոր են նշանակել Քոչարյանին։ Մասնավորապես, աչքի էր ընկել ՔՊ-ական Նաիրի Փեթակչյանը:

Արարատի մարզպետ աշխատելիս Գարիկ Սարգսյանը ամեն գնով փորձում էր ճնշել Ավշարի միջնակարգ դպրոցում ծագած բունտը՝ հայտարարելով, որ ուսուցիչների հետևում հայտնի քաղաքական ուժեր են կանգնած, նկատի ունենալով՝ Ավշարի Արայիկին և ՀՀԿ-ին: Սակայն, այդ մեղադրանքը չհաստատվեց, ուսուցիչներն էլ դատարանում հաղթեցին մարզպետին:

ՊԵԿ նախագահ Ռուստամ Բադասյանը վերջին հարցազրույցներից մեկում չէր բացառել, որ մաքսային ոլորտում կոռուպցիա կա: Ինչ խոսք, նա նկատի ուներ արդեն իսկ պաշտոնից հեռացած և այդ ոլորտը կուռացիայի ենթարկող Շուշանիկ Ներսիսյանին, ով իր հերթին հարցազրույցներում ակնարկներով նույն մեղադրանքը ուղղել է Բադասյանի հասցեին: Սակայն, երկու պաշտոնյայի հայտարարություններն էլ դեռևս ուսումնասիրոթյան առարկա չեն դարձել:

ԱԳՆ նախկին ղեկավար Արա Այվազյանը երկրի բարձրագույն ղեկավարությանը, հատկապես՝ Նիկոլ Փաշինյանին մեղադրում էր պետական շահերին դեմ գործելու մեջ: Սա ոչ այլ ինչ է, քան պետական դավաճանության հոդվածով հանցագործության մասին հաղորդում, սակայն պատկան մարմինները ոչ հերքել են, ոչ հաստատել Այվազյանի հնչեցրած այս մեղադրանքը:

Առողջապահության նախարար Անահիտ Ավանեսյանը, այսօր պատասխանելով Հաշվեքննիչ պալատի հայտնաբերած խախտումներին, մեղմ ակնարկ է արել կամ այսպես ասած` «բոչկա է գլորել» իր թիմակից էկոնոմիկայի նախարար Վահան Քերոբյանի վրա: Ավանեսյանը ակնարկել էր, որ հարցադրումներ առաջացրած ծրագրերը իրականացվել են էկոնոմիկայի նախարարության հետ համատեղ: Սա բավականին քողարկված փորձ է մեղավորության սլաքները ուղղել Վահան Քերոբյանի կողմը:

Ինչպես տեսնում ենք՝ վերը նշված դեպքերից և ոչ մեկը, որևէ մեղադրանք կամ հրապարակավ արված հայտարարություն այդպես էլ չի հիմնավորվել և հասարակության համար չի փաստարկվել, ապացուցվել: Սա նշանակում է, որ գործ ունենք դասական սուտ մատնության հետ և հարց է առաջանում՝ իսկ ե՞րբ են սուտ մատնության հոդվածով պատժվելու Փաշինյանի թիմակիցները...