Ինչու պատկան մարմինները չեն նկատում ՔՊ-ականների հայտարարագրերի «մութ» կետերը

Հեղափոխությունից հետո Նիկոլ Փաշինյանի կողմից շատ է խոսվում այն բանի մասին, որ իր թիմակիցները, ի տարբերություն այսպես կոչված` նախկինների, պետք է թափանցիկ աշխատեն, հաշվետու լինեն հանրությանը և որևէ կասկածելի պատմությունների մեջ թաթախված չլինեն: Սակայն, հեղափոխությունից շուրջ հինգ տարի անց Փաշինյանի թիմակիցների ներկայացրած հայտարարագրերը եթե չասենք, որ կոռուպցիոն ռիսկեր են պարունակում, այնուամենայնիվ որոշակի հարցեր են առաջացնում հասարակության տարբեր շերտերի մոտ:

Դիցուք՝  տարեկան հայտարարագրում Մաթևոս Ասատրյանի անշարժ գույքի քանակը պահպանվել է՝ 8-ն է: Ավտոմեքենաները երկուսն են՝ 2016 թվականին ձեռք բերված Toyota-ն եւ UAZ-ը: Բանկային հաշվին 2020 թվականի սկզվին առկա է եղել 227 հազար դրամ, որը տարեվերջին դարձել է 258 հազար դրամ, իսկ կանխիկ դրամը 1 մլն դրամից դարձել է 1 մլն 500 հազար դրամ: ՔՊ-ական պատգամավորի խորհրդարանից ստացած աշխատավարձը կազմել է 7 մլն 789 հազար դրամ, այսինքն՝ ամսական 649 հազար դրամ: Նա նաեւ ՀՀ առեւտրային բանկերից մեկից ստացել է 389 հազար դրամի չափով փոխառություն, վարկ: Պարզվում է՝ 2021 թվականի տարեկան հայտարարագրում ՔՊ-ական պատգամավորի կյանքում դրական փոփոխություն է տեղի ունեցել, նա բնակարանատեր է դարձել: Վերջինս նաև 30 մլն 399 հազար դրամով կամ 72 հազար դոլարով բնակարան է գնել Երեւանի Աջափնյակ վարչական շրջանում: Գործարքի մյուս կողմը «Նորիկ-70» ընկերությունն է:

Հայկ Սարգսյանի  տարեկան հայտարարագրում նշված է, որ բանկային հաշվին մնացորդը կազմել է 4 մլն 385 հազար դրամ: Իսկ կանխիկ գումարը՝ 24 մլն դրամ եւ 55 հազար դոլար: Նա բանկերից մեկից ստացել է 82 հազար դրամի եկամուտ, իսկ ամսական աշխատավարձը կազմել է 698 հազար դրամ: 2021 թվականի տարեկան հայտարարագրի ծախսերի վերաբերյալ հատվածում ոչինչ նշված չէ: Ուշագրավն այն է, որ պատգամավորը եւ 2021 եւ 2022 թվականների հայտարարագրերում ոչ մի տող չի հիշատակել Սեւանա լճի ափին գործող «White Shorja» ամառային լողափի, սրճարանի մասին: Այն, որ «White Shorja»-ն պատկանում է Սարգսյանին, այս մասին բազմաթիվ լրատվամիջոցներ գրել են: Ավելին` Սարգսյանի կինն է պարբերաբար լուսանկարներ է հրապարակում այդ լողափից: Բայց, չգիտես ինչու, Սարգսյանը գերադասել է լողափի մասին հայտարարագրերում չնշել:

ԱԺ պատգամավոր Արսեն Թորոսյանը հայտարարագրել է 20,804.00 և 10,360.48 եվրո, 12,843,129.00 ՀՀ դրամ, 12,177.59 ԱՄՆ դոլար: Թորոսյանի 2021 թվականի տարեկան հայտարարագրում հետաքրքիր գույքային փոփոխություններ են տեղի ունեցել. նա նախորդ տարի թվով 4 հողամաս է գնել, որից երկուսը՝ Արագածոտնի մարզի Փարպի համայնքում, իսկ մյուս երկուսը՝ Կոտայքի մարզի Քարաշամբում:Թորոսյանը 9 մլն 520 հազար դրամի չափով նվեր է ստացել Գեւորգ Թորոսյանից: Բացի այս, նա ԴԱՀԿ-ից ստացել է 779 հազար դրամի չափով եկամուտ, իսկ Bank Austria-ից՝ 20 հազար 737 եվրո:
Ի դեպ, Թորոսյանը ներկայացրել է նաեւ ծախսերի հայտարարագիր, որտեղ նշված է, թե որքան գումար է ծախսել հանգստի համար: Օրինակ՝ Թորոսյանը 341 հազար 581 ռուսական ռուբլիի եւ 1094 եվրոյի չափ ծախս կատարել է հանգստի ճանապարհածախսի վրա:

ԱԺ «Իմ քայլը» խմբակցության պատգամավոր Անդրանիկ Քոչարյանը հայտարարագրել է 30,000.00 և 11,999.00 ԱՄՆ դոլար, 9,797,090.00 և 2,000,000.00 ՀՀ դրամ: Հետաքրքիր է, թե պատգամավորի համեստ աշխատավարձով ապրող, որևէ բիզնես չունեցող Քոչարյանին որտեղից այս եկամուտները:

Իմքայլական մեկ այլ պատգամավոր Արփինե Դավոյանը պաշտոնը ստանձնելու օրվա դրությամբ հայտարարագրել էր 6,613,848.00 դրամի եկամուտ, իսկ արդեն մեկ տարի անց նրա եկամուտները կազմել են 576,360.00: Սա էլ է, մեղմ ասած, տարակուսելի՝ հաշվի առնելով պատգամավորների աստղաբաշխական պարգևավճարները:

Վահե Ղալումյանի՝ պաշտոնը ստանձնելու հայտարարագրում նշված են չորս հողամասերը, մեկ անհատական բնակելի տունը, երկու բեռնատարները: Նվիրատվության կամ օգնության կարգով ստացված գույքը, դրամական միջոցները (բացառությամբ աշխատանքի), ծառայության տեսքով ստացած դրամական միջոցները կազմել են 150,000.00 ռուբլի: Ուշագրավն այն է, որ արդեն տարեկան հայտարարագրում հողամասերը և անգամ անհատական բնակելի տունը անհետացել են, չկան նաև բեռնատարները, որոնցից միայն մեկի ճակատագիրն է հայտնի՝ այն օտարվել է 1,930,000.00 դրամով, իսկ հարկային տարում Ղալումյանի դրամական միջոցները կազմել են 3,630,643.00 դրամ:

Անշուշտ, հարցեր, ինչպես հասկանում ենք, առաջանում են և զարմանալի է, որ որոշ պաշտոնյաների առավել կասկածելի թվացող հայտարարագրեր մինչ օրս պատկան մարմինների կողմից չեն ուսումնասիրվել, որպեսզի առնվազն փարատվեին հասարակության տարբեր շերտերի մոտ առկա կասկածներն ու հարցերը...