Անլուծելի խնդիր Փաշինյանի համար. ովքեր են մանիպուլացնում թվերն ու փաստերը

Փաշինյանի կառավարությունը իշխանության գալուց անմիջապես հետո սկսեց հաշվառել 88-ի երկրաշարժից հետո տեղադրված ժամանակավոր կացարանները՝ պարզելու, թե որքան գումար կպահանջվի խնդրի լուծման համար։ Հաշվեցին, որ Հայաստանի տարբեր բնակավայրերում ավելի քան 6000 տնակ կա։

Բայց չորս տարի շարունակ գործն առաջ չէր գնում, և միայն օրերս գործադիրը մի որոշում ընդունեց, որով մի քանի տարբերակ է առաջարկում տնակներում բնակվողներին՝ նրանց կացարանները քանդելու դիմաց։ Վերջնաժամկետ էլ կա՝ նախատեսված է խնդիրն ամբողջությամբ լուծել մինչև 2027 թվականը։

Բայց ուշագրավն այստեղ այն է, որ Փաշինյանը արդեն մի քանի տարի է ինչ պնդում է՝ աղետի գոտու խնդիրը իր կառավարությունը լուծել է: Այս ընթացքում նա նույնիսկ իր լուծած խնդրի հիմքում դրված թվերն է հասցրել մանիպուլացնել: 2020 թվականի հունվարի 24-ին վարչապետ Նիկոլ Փաշինյանը Կապան քաղաքում լրագրողների հետ հանդիպմանը հերթական 100 փաստը ներկայացնելիս, խոսելով աղետի գոտու տուժած ընտանիքներին բնակարանով ապահովելու խնդրի մասին, հայտարարել էր, որ 2020 թ. կլուծվի երկրաշարժի հետևանքով անօթևան մնացած 453 ընտանիքների բնակարանի խնդիրը։ Բայց 2021-ին պարզվեց, որ  լուծվել է ընդամենը 229 ընտանիքի բնակարանի ապահովման խնդիրը:

Անդրեյ Ղուկասյանը՝ Լոռու նախկին մարզպետը, 2 տարի առաջ հայտարարում էր, որ աղետի գոտի հասկացությունը երկու տարի անց այլևս չի լինի:

Ի՞նչ է ստացվում. պաշտոնյաները այսքան տարի պարզապես խաբե՞լ են աղետի գոտու բնակիչներին, զբաղվել պոպուլիզմո՞վ, արել ականջահաճո հայտարարություննե՞ր, թե պարզապես բյուջեից նոր գումարներ են ցանկանում դուրս գրել, սա էլ թերևս ամենալեգիտիմ պատճառներից մեկն է....