Եվ՛ նալին, և՛ մեխին. ինչպես է Փաշինյանը «պատժում» նախկին պաշտոնյաներին

2022 թվականի հոկտեմբերի 12-ին ՀՀ գլխավոր դատախազի տեղակալի կողմից որոշում է կայացվել դատավոր Ա.Հ.-ի նկատմամբ հարուցել հանրային քրեական հետապնդում՝ դատական իշխանության մարմնի պաշտոնատար անձի կողմից հանցավոր ճանապարհով ստացված, առանձնապես խոշոր չափերով գույքի օրինականացմանն օժանդակելու, ինչպես նաև դատավոր Ա.Հ.-ի կողմից նույն չափերով հայտարարագրում  կեղծ տվյալ ներկայացնելու համար (2003 թվականի ապրիլի 18-ին ընդունված ՀՀ քրեական օրենսգրքի 38-190-րդ հոդվածի 3-րդ մասի 1-ին կետ և 314.3-րդ հոդվածի 2-րդ մաս): Որոշումը կայացվել է Ազգային անվտանգության ծառայության քննչական դեպարտամենտում քննվող քրեական վարույթով ձեռք բերված հանցանքի կատարումը վկայող փաստերի հիման վրա: Որոշման մասին «ՀՀ դատական օրենսգիրք» Սահմանադրական օրենքով նախատեսված կարգով իրազեկվել է ՀՀ բարձրագույն դատական խորհուրդը, որից հետո դատավոր Ա.Հ.-ին ներկայացվել է մեղադրանք: Ուշագրավն այստեղ այն է, որ վերը նշված Ա.Հ-ն  Անի Հարությունյանն է, ԴԱՀԿ նախկին պետ Միհրան Պողոսյանի զարմուհուն և ԱԱԾ ՀՀ ԱԱԾ նախկին պետի տեղակալ Գրիշա Հարությունյանի դուստրը: Միհրան Պողոսյանն էլ Գրիշա Հարությունյանի քրոջ որդին է։

Այսինքն` իշխանությունները մի կողմից քրեական վարույթ են հարուցում Միհրան Պողոսյանի ազգականի դեմ, մյուս կողմից իշխանությունները բավական մեծ արտոնություններ են տրամադրում այդ նույն Պողոսյանի ազգականներին: Դիցուք՝ Հայաստանի կառավարությունը մտադիր է արգելել սև և գունավոր մետաղի ջարդոնի արտահանումը երկրից։ Համապատասխան որոշման նախագիծն ընդունվեց կառավարության  նիստում։ Կան մի շարք ընկերություններ, որոնք շահագրգռված են այդ արգելքով, մասնավորապես`  «Ասկե Գրուպը»: «Ասկե գրուպի» հիմնադիրը ԱԺ ՀՀԿ խմբակցության նախկին պատգամավոր Վահան Հարությունյանն է, իսկ բաժնետոմսերի մոտ 50 տոկոսը, ըստ ընկերության համապատասխան փաստաթղթերի, գործարար Միխայիլ Հարությունյանինն է, որը Վահան Հարությունյանի հայրն ու արդարադատության նախարարության Դատական ակտերի հարկադիր կատարման ծառայության նախկին ղեկավար Միհրան Պողոսյանի քեռին է։ 

Ընդ որում, պետք է փաստենք, որ այսպիսի մոտեցում նկատվում է ոչ միայն Միհրան Պողոսյանի և վերջինիս ազգականների հարցում: Դիցուք՝ նախկին վարչապետ Հովիկ Աբրահամյանի ընտանիքի անդամների դեմ դատախազությունում քրեական գործ է հարուցված ապօրինի գույքի բռնագանձման մասով: Աբրահամյանի որդին՝ Արգամ Աբրահամյանը անգամ հասցրել է այցելել դատախազություն, Հովիկ Աբրահամյանը դեռևս չի ներկայացել: Սակայն, մյուս կողմից էլ իշխանությունները որևէ խոչընդոտ չեն տեսնում նույն Հովիկ Աբրահամյանի հետ ասոցացվող բիզնեսներին լավ աչքով նայելու մեջ: Օրերս տեղեկություն տարածվեց, որ 2020 թվականի հունվարի 9-ին, գրանցվել է մի նոր ընկերություն՝ «Վայկ-ինվեստ» ՍՊԸ-ն, որը հասցրել է մի քանի օրվա ընթացքում դիմել Վայքի և Զառիթափի համայնքապետարաններ՝ Ազատեկի ոսկու-բազմամետաղային հանքի՝ ստորերկրյա եղանակով շահագործման նախագծի հայտով հանրային լսումներ կազմակերպելու համար։ Կարճ ժամանակում հայտնի է դառնում, որ լսումներ կանցկացվեն միայն Զառիթափում, իսկ Վայք համայնքում, որի վարչական տարածքում է Ազատեկը, լսումներ չեն լինի։ Ամեն դեպքում, այդ մասին տեղեկությունները Վայքի համայնքապետարանի կայքում բացակայում են։ Նորահայտ «Վայկ Ինվեստ» ՍՊԸ-ի սեփականատերերը խաչվում են Արամ Օսիկյանի անվան հետ, ով Հայաստանի տարբեր տարածքներում ընդերքօգտագործման կամ երկրաբանական ուսումնասիրությունների լիցենզիաներ ստացած մի շարք ընկերությունների հիմնադիրներից է, նախկին վարչապետ Հովիկ Աբրահամյանի ընտանիքի մերձավոր անձ է և նախկինում նաև ղեկավարել է Հովիկ Աբրահամյանի որդու՝ Արգամ Աբրահամյանի ընկերությունները. նրանց կապերի մասին ԶԼՄ-ներում բազմաթիվ հրապարակումներ կան: Իսկ ահա նորաստեղծ «Վայկ-ինվեստ» ընկերության համասեփականատերերից մեկը գրանցված է Արամ Օսիկյանի դստեր բնակության հասցեում։ Ինչպես երևում է՝ Վայքի նորընտիր ՔՊ-ական համայնքապետ Մխիթար Մաթևոսյանը որոշել է հետ կանգնել Վայքը էկո համայնք դարձնելու մտադրությունից և նախընտրում է առաջնորդվել Հովիկ Աբրահամյանի մերձավորների բիզնես շահերով:

Թե ինչով է առաջնորդվում Նիկոլ Փաշինյանը, ում իշխանության օրոք նախկին պաշտոնյաների դեմ կիրառվում է մեկ նալին, մեկ մեխին խփելու քաղաքականությունը, դժվար է ասել, սակայն ակնհայտ է, որ իշխանությունները դեռևս չեն կողմնորոշվել թե «պատժել չի կարելի ներել» նախադասության մեջ որտեղ են դնելու ստորակետը...