Նախկին օդիոզ պաշտոնյաներից ովքեր են «օգնության ձեռք» մեկնել Փաշինյանին և ՔՊ-ին

Օրեր առաջ մամուլում տեղեկություններ էին տարածվել, որ իշխող կուսակցությունը քաղաքապետի ընտրություններին ընդառաջ ցանկանում է մոբիլիզացնել նախկին ՀՀԿ-ական օդիոզ դեմքերին՝ ՔՊ համար քվե բերելու նպատակով: Իսկ նրանք, ովքեր կհրաժարվեն համագործակցել ՔՊ-ի հետ կզգան, ինչպես մամուլն է պնդում, ասֆալտին պառկելու կասկածելի հաճույքը:

Դժվար է ասել` արդյոք կստացվի այդ համագործակցությունը, թե ոչ, սակայն անցած տարիները ապացուցում են, որ նախկին ՀՀԿ-ական օդիոզ դեմքերի և ՔՊ համագործակցությունը, ամեն դեպքում առաջ, գնում է և հենց նախկին պաշտոնյաների օգնությամբ էլ շատ դեպքերում ՔՊ-ն կարողանում է վերարտադրվել մարզերում:

Դիցուք՝ նախորդ տարվա դեկտեմբերի 5-ին Արտաշատում կայացած ՏԻՄ ընտրությունների արդյունքում համայնքի ղեկավար ընտրվեց ՔՊ-ական Կառլեն Մկրտչյանը՝ ստանալով քվեների 60 տոկոսից ավելին: Ընտրություններից անմիջապես հետո մամուլը գրեց, որ Արտաշատում իր հաղթանակով ՔՊ-ն պարտավոր է նախկին վարչապետ Հովիկ Աբրահամյանին և վերջինիս շրջապատին: Սակայն, ըստ նույն մամուլի, Արտաշատում Հովիկ Աբրահամյանի՝ ՔՊ-ին աջակցելը միայն իշխանության հետ գործարքի գնալով չէր պայմանավորված։ Աբրահամյանների համար շատ կարեւոր էր նաեւ, որ հանկարծ չհաղթեր եւ քաղաքապետ չդառնար այս ընտրություններին «Օրենք եւ արդարություն» կուսակցության նախագահ Կարեն Ղազարյանը՝ Արտաշատում հայտնի Հովհաննես Ղազարյանի (Գազի Հովոյի) որդին։ Աբրահամյաններն այս ընտանիքի հետ վաղեմի թշնամանքի մեջ են, մի ժամանակ հարաբերությունները այնքան էին լարվել, որ անգամ փոխհրաձգություններ էին լինում, կրակում էին իրար վրա։ Ու հիմա Հովիկ Աբրահամյանն ու որդին՝ Արգամը, ՔՊ-ին աջակցելով՝ նաեւ իրենց ոխերիմ թշնամու դեմն են առել Արտաշատում։

Արագածոտնի մարզի երբեմնի տեր ու տնօրեն Սահակյան եղբայրները՝ նախկին մարզպետ Սարգիս Սահակյանը եւ «Հայդուկ» ՀԿ ղեկավար Նաիրի Սահակյանը, միացել են ՔՊ-ական մարզպետին ու ակտիվ աշխատում են ՏԻՄ-ում ՔՊ-ի թեկնածուների հաղթանակի համար։ Նրանք ԱԺ ընտրությունների ժամանակ «Պատիվ ունեմ» դաշինքի մարզային շտաբն էին ղեկավարում։ Այնուհետև Թալինում Տավրոս Սափեյանին էին աջակցում, քանի որ «իմ թշնամու թշնամին իմ բարեկամն է», իսկ Տավրոսի մրցակիցը ՀՀԿ-ական նախկին պատգամավոր, Թալինի նախկին քաղաքապետ Մնացական Մնացականյանն է, որի նկատմամբ նրանք վաղեմի թշնամանք ունեն։ Սահակյաններն աջակցում էին նաեւ Աշտարակի ՔՊ թեկնածու Թովմաս Շահվերդյանին։ Նրանք կոնսոլիդացրել էին իրենց նախկին համայնքապետերին, նախկին քաղաքապետ Սարգիս Արամյանին եւ համակարգում էին ձայնահավաքը:

 Իր հերթին Ալեքսան Պետրոսյանը՝ ՄԱՊ-ի Ալիկն էլ ժլատությամբ աչքի չի ընկնում և բավականին կլոր գումարների փոխանցումներ է կատարում Նիկոլ Փաշինյանի ընտանեկան՝ «Իմ քայլը» հիմնադրամին: Դիցուք՝ 2020 թվականին նա մեկ միլիոն դրամ է փոխանցել Մխիթար Հայրապետյանի ղեկավարած ֆոնդին: Զարմանալի չէ, որ Պետրոսյանների ընտանիքը այլևս չի թիրախավորվում:

Ջերմուկում տեղի ունեցած վերջին ՏԻՄ ընտրություններին ընդառաջ համայնքում ՔՊ-ի համար ակտիվորեն մոբիլիզացվել էին նախկին ՀՀԿ-ական օլիգարխ, «Ջերմուկ Գրուպ»-ի սեփականատեր Աշոտ Արսենյանի ռեսուրսները և դա հասկանալի է, չէ որ ՔՊ-ի համայնքապետի թեկնածուն հենց Արսենյանի որդին էր՝ Վահագն Արսենյանը:

Ինչպես տեսնում ենք՝ ՔՊ-ի և նախկին ՀՀԿ-ական օդիոզ դեմքերի համագործակցությաւնը ստացվում է: Մարզերում, որտեղ ձևավորված ավանդույթի համաձայն ուժեղ մարզպետ-ֆիգուրներ ՔՊ-ն այդպես էլ չունեցավ, օգնության ձեռք են մեկնում երկար տարիներ այդ մարզերում և համայնքներում ասողները, ովքեր այսօր էլ օգնում են վերարտադրվել ՔՊ-ի իշխանությանը...