Թափանցիկության ջատագով ՔՊ-ականների հայտարարագրերի «մութ» կետերը

Հեղափոխության օրերին Նիկոլ Փաշինյանը և իր թիմակիցները փորձում էին ստեղծել այնպիսի տպավորություն, որ իրենք էլ հասարակ, քյասիբ հեղափոխականներ են՝ մի կերպ վարկերով գոյատևող, ասել է թե՝ մեկն են ժողովրդից:  2018 թվականին գուցե և իրոք այդպես էր, որովհետև մի շարք պաշտոնյաների հայտարարագրեր, իրոք, արտացոլում էին վերցրած վարկերը: Թե որքանով էին նրանցով գոյատևում այդ անձինք՝ դժվար է ասել, սակայն հեղափոխությունը կտրուկ փոխեց նրանց սոցիալ-տնտեսական վիճակը: Սակայն, հարցը միայն վերջիններիս կյանքի կտրուկ բարելավման մեջ չէ, այլ նաև նրանում, որ իշխանությունները փաստացի համընդհանուր հայտարարարգրման ինստիտուտ են ցանկանում մտցնել Հայաստանում, և դա բացատրում են թափանցիկություն ապահովելու ցանկությամբ: Մինչդեռ շատ և շատ ՔՊ-ական պաշտոնյաների հայտարարագրերում թափանցիկության հետք անգամ չկա:

Դիցուք՝ պատգամավոր Արեն Մկրտչյանի հայտարարագիրը անչափ ուշագրավ է: Պաշտոնը ստանձնելիս նա փաստացի դատարկ թուղթ է ներկայացրել, որտեղ նշված չէ բառացիորեն ոչինչ: Իսկ ահա մեկ տարի անց Մկրտչյանը հայտարարագրել է 6,389,488.00 ՀՀ դրամի եկամուտ:

Վահե Ղալումյանի՝ պաշտոնը ստանձնելու հայտարարագրում նշված են չորս հողամասերը, մեկ անհատական բնակելի տունը, երկու բեռնատարները: Նվիրատվության կամ օգնության կարգով ստացված գույքը, դրամական միջոցները (բացառությամբ աշխատանքի), ծառայության տեսքով ստացած դրամական միջոցները կազմել են 150,000.00 ռուբլի: Ուշագրավն այն է, որ արդեն տարեկան հայտարարագրում հողամասերը և անգամ անհատական բնակելի տունը անհետացել են, չկան նաև բեռնատարները, որոնցից միայն մեկի ճակատագիրն է հայտնի՝ այն օտարվել է 1,930,000.00 դրամով, իսկ հարկային տարում Ղալումյանի դրամական միջոցները կազմել են 3,630,643.00 դրամ:

Դիցուք՝ Աշտարակի երկարամյա քաղաքապետ Թովմաս Շահվերդյանը, ով, սակայն, վերջին ՏԻՄ ընտրություներին ստացավ ՔՊ-ի անվերապահ աջակցությունը, կանխիկ դրամ է  հայտարարագրել` 7,000,000.00 ՀՀ դրամ և 9,000.00 ԱՄՆ դոլար: Սա մի դեպքում, երբ աշխատանքից ստացված եկամուտը 3,722,101.00 ՀՀ դրամ է, բանկային հաշվի մնացորդն էլ՝ 8,053,071.00 ՀՀ դրամ: Այս դեպքում այնքան էլ հասկանալի չէ, թե որտեղից վերը նշված 9,000.00 ԱՄՆ դոլարը, այդ գումարի ծագման և աղբյուրների մասին տեղեկություն չկա:

Արարատի համայնքապետ ընտրված Ասլան Ավետիսյանը հայտարարագրել է 38,590,000.00 դրամի չափով բաժնետոմս, սակայն թե որ ընկերությունում 99.33 տոկոսի հասնող բաժնեմասնակցություն ունի Ավետիսյանը՝ հանրությանը չի ներկայացվել: 2020 թվականին նրա եկամուտները կազմել են ընդամենը 300,220.00 դրամ, իսկ կանխիկ դրամը՝ 10,000,000.00:

ԱԺ «Իմ քայլը» խմբակցության պատգամավոր Անդրանիկ Քոչարյանը հայտարարագրել է 30,000.00 և 11,999.00 ԱՄՆ դոլար, 9,797,090.00 և 2,000,000.00 ՀՀ դրամ: Հետաքրքիր է, թե պատգամավորի համեստ աշխատավարձով ապրող, որևէ բիզնես չունեցող Քոչարյանին որտեղից այս եկամուտները:

2020-ին Եղեգնուտ համայնքի ղեկավարի տեղակալի պաշտոնը ստանձնած Համլետ Մանուկյանը նվիրատվություն է ստացել միանգամից 5 ավտոմեքենա՝ OPEL,TOYOTA. MITSUBISHI, VOLKSWAGEN, PORSCHE:

Պատգամավոր, իմքայլական Աննա Կարապետյանի՝ նվիրատվության կամ օգնության կարգով ստացված գույքը, դրամական միջոցները՝ բացառությամբ աշխատանքի, ծառայության տեսքով ստացած, կազմել են 2,400 և 3,500 դոլար:

Արսեն Թորոսյանի նվիրատվության բաժնում լրացրած տողում գրված է, թե 2021 թվականին 9 միլիոն 520 հազար դրամ  է նվիրատվություն ստացել:

Ի դեպ,  ՀՀ կոռուպցիայի կանխարգելման հանձնաժողովն ուշագրավ որոշում է կայացրել, որը խառնաշփոթ է ստեղծել պետական պաշտոն զբաղեցնող անձանց շրջանում: Մասնավորապես, ըստ լրատվամիջոցներում հայտնված տեղեկության,  հանձնաժողովը որոշել է վերլուծել պետական պաշտոն զբաղեցնող անձանց եւ նրանց ընտանիքների անդամների՝ 2021 թվականի տարեկան հայտարարագրերը, ինչպես նաեւ 2022 թվականի պաշտոնեական պարտականությունները ստանձնելու, դադարեցնելու հայտարարագրերը: Հետաքրքիր է՝ ինչ կալիբրի չինովնիկներ են հայտնվելու հանձնաժողովի ուշադրության կիզակետում և կլինեն նրանց շարքում արդյոք կարկառուն ՔՊ-ականներ, թե կբավարարվեն միայն «մանր ձկներին» ջրի երես հանելով և արդյո՞ք թափանցիկության ապահովումը իշխանությունները կսկսեն հենց իրենցից...