Գեղամ Գևորգյանը «չի նկատում» հին ու նոր օլիգարխների չարաշահումներն ու խախտումները

Վերջին օրերին ՄՊՀ ղեկավար Գեղամ Գևորգյանը բավական մեծ ակտիվություն է ցուցաբերում, նրա ղեկավարած կառույցը հանդես է գալիս ռելիզներով, որոնցում տեղեկացնում է հանրությանը, որ տուգանվել է այս կամ այն ՍՊԸ-ն: Բացառությամբ Հայփոստի և Օնեքսի, մնացած բոլոր ՍՊԸ-ները, մեղմ ասած, հանրությանը այնքան էլ լավ ծանոթ չեն: Մինչդեռ այդ նույն հանրությունը տեղյակ է շատ ավելի շատ կասկածելի գործարքների մեջ թաթախված ընկերությունների գործունեությունից և պոտենցիալ խախտումներից, որոնք նաև մամուլում են լուսաբանվել: Մինչդեռ Գեղամ Գևորգյանը շարունակում է համառորեն դրանք չնկատելու տալ:

ՄՊՀ նախագահ Գեղամ Գևորգյանը, ինչպես երևում է, այնքան էլ չի հաջողում մենաշնորհների և հակամրցակցային վարքի դեմ իր ծավալած պայքարում: Ամիսներ առաջ պարզվել է, որ «Շիրակ» թռչնաֆաբրիկան, ըստ ՏՄՊՊՀ-ի, հասարակությանը մոլորեցնելով, «Էկո», «էկոդեմոնստրատոր» եւ «օրգանիկ» բառերով հավկիթ է արտադրել, ինչը օրենքի խախտում է:  Ավելին՝ հանձնաժողովը հանձնարարել է նաեւ «Շիրակ» ընկերությանը, որ ամբողջությամբ հավաքի արտադրված հավկիթները բոլոր խանութներից: «Ժողովուրդ» օրաթերթը արձանագրել է, որ մինչ օրս մի շարք խանութներում վաճառվում են «ԷԿՈ» մակնշմամբ հավկիթներ՝ շրջանցելով հանձնաժողովի որոշում-արգելքը: Ինչպե՞ս է ստացվում, որ արգելքի որոշման առկայության պայմաններում այսօր առեւտրի կենտրոններում վաճառվում են «Արզնի» եւ «Շիրակ» թռչնաֆաբրիկաների կողմից արտադրված «ԷԿՈ» մակնշմամբ հավկիթներ: Ինչպես երևում է` ՄՊՀ նախագահ Գեղամ Գևորգյանին չի հաջողվում սանձել «Շիրակ» թռչնաֆաբրիկայի սեփականատեր, իշխանությունների սրտի նորաթուխ օլիգարխ Նարեկ Նալբանդյանին, ով, հիշեցնենք, նաև «Գոլդեն Փելըս» հյուրանոցային համալիրի նոր սեփականատերն է, իսկ մամուլը համառորեն պնդում է, որ վերջինս բավական սերտ կապեր ունի ՊՎԾ պետ Ռոմանոս Պետրոսյանի հետ: 

Շաբաթներ առաջ կառավարության նիստից անմիջապես հետո ուշագրավ բացահայտմամբ հանդես եկավ ՄՊՀ նախագահը: Նա, մասնավորապես, հայտարարեց, որ կարագի շուկայում գերիշխող դիրք է զբաղեցնում «Ալեքս հոլդինգը»: Ում համար է սա բացահայտում՝ դժվար է ասել, քանի որ «Ալեքս հոլդինգը» գերիշխող դիրք զբաղեցնում էր թե մինչև հեղափոխությունը, թե հեղափոխությունից հետո: Այլ բան է, թե ինչու են իշխանությունները այսօր հրապարակային այդ մասին հիշում` կարծես հանդիմանելով գործարար Սամվել Ալեքսանյանին կամ որոշակի մեսիջ հղելով նրան: Սակայն, ուշագրավը ոչ թե բացահայտումն էր, այլ այն, որ դրանից հետո որևէ գործողություն չհետևեց:

Կառույցը  դեռևս չի պարզել, թե ինչպես ՊՇՌ թեստավորում իրականացնող լաբորատորիաները քաղաքացիների գրպանի հաշվին միլիարդներ վաստակեցին՝ հսկայական թվեր և գներ կրակելով: Երբ ավիատոմսերի գները մեկ օրում հասան իրենց պիկին, կառույցը նույնպես չփորձեց հասկանալ պատճառը, չնայած եղան բազմաթիվ բողոքներ և դժգոհություններ:

Բանանի շուկայում երկար ժամանակ ընթացող սուգումները նույնպես որևէ լուրջ արդյունք չտվեցին: Սակայն, իշխանությունները հայտարարում են, որ շուկան կարողացել են մաքրել ԴԱՀԿ նախկին պետ Միհրան Պողոսյանի մենաշնորհից: «Քեթրին Գրուպ»-ին փոխկապակցված մեկ այլ՝ «Ֆրուտ Վորլդ» ընկերությունը, շարունակում է իր գործունեությունը բանանի շուկայում: Բանան ներկրողների ցանկում շարունակում է գործել նաև Հայաստանի 3-րդ նախագահ Սերժ Սարգսյանի եղբորորդուն՝ Հայկ Սարգսյանին պատկանող «Ակնաձոր» ընկերությունը:    Նոր տնտեսվարողների ցանկում է «Բանանեկ» ընկերությունը, որը պետռեգիստրում գրանցվել է 2018-ի հունիսի 29-ին: Հիմնադիրը «Քեթրին Գրուպ» ընկերության սեփականատեր, գլխավոր տնօրեն Ռիկարդո Անտոնիո Մերինոն է, որը Միհրան Պողոսյանի մտերիմն է համարվում։