Ինչով են աչքի ընկել Երևանի փոխքաղաքապետերը. Լևոն Հովհաննիսյան

2021 թվականի դեկտեմբերի 28-ին Երևանի ավագանու որոշմամբ քաղաքապետի առաջին տեղակալ նշանակվեց Լևոն Հովհաննիսյանը:  Վերջինս 2018թ. սեպտեմբերի 23-ին կայացած Երևանի ավագանու արտահերթ ընտրությունների արդյունքում «Իմ քայլը» կուսակցությունների դաշինքի համամասնական ցուցակով ընտրվել է Երևան քաղաքի ավագանու անդամ: 2018թ. հոկտեմբերից – 2019թ. մարտ Երևանի ավագանու ֆինանսավարկային և տնտեսական հարցերի մշտական հանձնաժողովի փոխնախագահ է եղել: Իսկ 2019թ. մարտից  Երևանի ավագանու ֆինանսավարկային և տնտեսական հարցերի մշտական հանձնաժողովի նախագահ: 

Թեև, ըստ տարբեր աղբյուրների, քաղաքապետարանում բացի բուն քաղաքապետից, այլ քաղաքապետեր ևս կան և նրանք համարվում են այս կամ այն բարձրաստիճան պաշտոնյայի մարդը, քաղաքապետի առաջին տեղակալ Լեւոն Հովհաննիսյանը,  քաղաքական իշխանության՝ «Քաղաքացիական պայմանագիր» կուսակցության ներկայացուցիչն է: Նա էր Հայկ Մարությանին անվստահություն հայտնելու առաջամարտիկներից մեկը և ըստ Երևանի ավագանու արդեն նախկին անդամ Գրիգոր Երիցյանի, ով պաշտպանում էր Մարությանին, Լևոն Հովհաննիսյանը փոխանցել է՝ եթե վայր չդնես մանդատը, կսառեցնեն քաղաքապետին կից «Երիտասարդության հարցերի խորհրդի» բյուջետային ֆինասավորումը: Դեռևս ավագանու անդամ եղած ժամանակ էլ Հովհաննիսյանն աչքի է ընկել նրանով, որ մի սկանդալային նախագիծ էր բերել, որով առաջարկում էր բարձրացնել քաղաքապետարանի 2 հազարից ավելի աշխատակիցների աշխատավարձերը՝ հաստիքները կրճատելու և խնայողություններ անելու փոխարեն: Հովհաննիսյանի փոխքաղաքապետ ընտրվելու օրն իսկ տեղի ունեցավ լուրջ սկանդալ․ ավագանու ընդդիմադիր անդամը վերջինիս մեղադրեց ՔՊ խմբակցության ներսում ինտրիգներ հյուսելու և խժդժություններ հրահրելու մեջ:

Մարությանի հետ էպոպեայի ավարտին Հովհաննիսյանն ընտրվեց փոխքաղաքապետ և սպասվում էր, որ աչքի կընկնի բավականին բուռն աշխատանքով: Բուռն աշխատանքի առաջին ծիծեռնակները եղան վերջինիս կողմից ներկայացված մի շարք ռեզոնանսային նախագծերը, որոնցից մեկը վերաբերվում էր Երևան քաղաքում ավտոկայանատեղիների տուրքերի փոփոխմանը: Փոխքաղաքապետն իր նախագծով նախատեսել է մեկ ավտոկայանատեղիի համար 300.000 դրամ գումար, որն ըստ գործող սանդղակի՝ մաքսիմալն է: Թե որքանով այս փոփոխությունը կընդունվի երևանցիների կողմից՝ դժվար է ասել:

Բացի այդ, հոկտեմբերի 18-ին Լևոն Հովհաննիսյանը հայտարարել էր, որ մինչեւ 2023 թվականի մարտի վերջ Երեւանի տրանսպորտային պարկը կհամալրվի 90 տոկոսով։ Մինչդեռ պարզից էլ պարզ է, որ Հովհաննիսյանի նշված ժամանակահատվածում այս խնդիրը չի կարգավորվելու, հետևաբար կարող ենք ասել, որ փոխքաղաքապետի այս մեկ հավաստիացումն էլ գրվելու է սառույցին:

2022-ի Երևանի բյուջեի նախագիծը նույնպես ներկայացրել է Լևոն Հովհաննիսյանը, ըստ էության, նրա կուռացիայի տակ է գտնվում հենց ֆինանսական և բյուջետային բլոկը: Տեսնենք, թե այս մասով փոխքաղաքապետը, ինչ հաջողություններ է արձանագրել: 

Բյուջեն եկամուտների ավելացման մասով լուրջ և հեղափոխական փոփոխություններ չեն արձանագրվել, սակայն ազալցակայաններում հեղուկ և սեղմված գազի, իսկ բենզալցակայաններում՝ բենզինի տեղական տուրքերն են փոփոխվել: Յուրաքանչյուրի մասով տուրքը տարեկան կտրվածքով կբարձրացել է 600000 դրամի չափով: Եվ սա թերևս պայմանավորված է նրանով, որ քաղաքապետարանն իսկապես բյուջեն համալրելու լուրջ խնդիր ունի: Ի դեպ, ծախսային մասով թերակատարվել էր նաև նախորդ տարվա բյուջեն, 5 անգամ պակաս է եղել երեխայի իրավունքների եւ շահերի պաշտպանության նպատակով ծախսը. երեխաներն ապահովվել են 3,2 միլիոն դրամի գրենական պիտույքներով: Շրջակա միջավայրի պաշտպանության ենթակառուցվածքների զարգացման ծրագրով նախատեսված ավելի քան 409 միլիոն դրամի փոխարեն ծախսվել է ընդամենը 6 միլիոն դրամ՝ կենդանիների վնասազերծման կենտրոնի ադմինիստրատիվ շենքի կառուցման համար: Վերակառուցման եւ զարգացման եվրապական բանկի աջակցությամբ իրականացվող «Երեւանի քաղաքային լուսավորության ծրագիր»-ն ու Արեւելյան Եվրոպայի էներգախնայողության եւ բնապահպանական գործընկերության ֆոնդի աջակցությամբ իրականացվող «Երեւանի քաղաքային լուսավորության» դրամաշնորհային ծրագիրը ևս թերակատարվել են, քանի որ փաստացի ծախսը եղել է 61 միլիոն դրամ նախատեսված 674 միլիոնի փոխարեն: Հանգստի գոտիների ու զբոսայգիների կառուցման ու պահպանման աշխատանքները կատարվել են 62%-ով:

Ուշագրավ է, որ ոլորտային հասարակական կազմակերպությունները Հրազդան գետի ու Երեւանյան լճի բարեկարգման ծրագրի մասին տեղեկացել են այն հաստատելուց հետո միայն: ԱլԳ քաղհասարակության Հայաստանի ազգային պլատֆորմի 3-րդ խումբը առաջարկություններ էր ներկայացրել Լևոն Հովհաննիսյանին ու խնդրել համատեղ վերանայել այդ ծախսերը՝ դրանք առավել նպատակային ու արդյունավետ դարձնելու համար: Առաջարկը, սակայն, անտեսվել էր:

Ահա այսպիսի հաջողություններ է գրանցել փոխքաղաքապետի պաշտոնը զբաղեցնող և փաստացի ֆինանսական ու բյուջետային բլոկը կուրացիա անող Լևոն Հովհաննիսյանը:

Հաջորդիվ կանդրադառնանք Երևանի քաղաքապետի մյուս տեղակալների աշխատանքի արդյունքներին: