Թևեր և թիմեր. ինչ պատկեր է ՔՊ Արմավիրի «ներքին խոհանոցում»

Թավշյա հեղափոխությունից հետո Նիկոլ Փաշինյանը հավաստիացնում էր, որ իր թիմի ներսում, ի տարբերություն նախկինում իշխող կուսակցության, որևէ պառակտում, այսպես ասած` թևեր կամ թիմեր չկան և չեն կարող լինել: Սակայն, հեղափոխությունից գրեթե հինգ տարի անց կարող ենք փաստել, որ Փաշինյանը փոքր-ինչ սխալվել է իր կանխատեսումներում, ՔՊ-ում առկա են բազմաթիվ թևեր, որոնք չեն խորշում պայքարել իշխանության հավելյալ լծակների համար:

Դիցուք՝ Արմավիրի մարզում ՔՊ-ի մի թևը գլխավորում է Արմավիրի համայնքապետ Դավիթ Խուդաթյանը: Նա, կարելի է ասել, հնաբնակներից է և 2018-ից մինչ այս պահը շարունակում  է պաշտոնավարել: Տարիներ առաջ մամուլը գրում էր, որ լարված էին Խուդաթյանի և այն ժամանակ դեռ մարզպետ Համբարձում Մաթևոսյանի հարաբերությունները: Արմավիրի մարզպետը և քաղաքապետը նույնիսկ առանձին-առանձին էին ծաղկեպսակ դրել Արմավիրի քաղաքային զբոսայգում տեղադրված Ցեղասպանության զոհերի հիշատակի խաչքարի մոտ: Նրանք միմյանց մեղադրում էին անգործության և իրավիճակին չտիրապետելու մեջ։

Համբարձում Մաթևոսյանը, հեռանալով մարզպետի պաշտոնից, մարզից․ սակայն դեռևս չի հեռացել և այստեղ պահպանում է իր ազդեցության գոտիները: Վերջինիս դիրքերը փոքր-ինչ թուլացան այն բանից հետո, երբ Մաթևոսյանը ՔՊ վարչության ընտրություններից հետո կայացած վերահաշվարկի արդյունքում դուրս մնաց վարչության կազմից, սակայն Արմավիրում նա շարունակում է պահպանել ազդեցության լծակները: Մամուլը բազմիցս էր գրել այն մասին, որ Արմավիրի մարզպետ Համբարձում Մաթևոսյանը հանդիսանում է Արարատ Միրզոյանի մտերիմը և հենց նրա բարձր հովանու ներքո էլ ստացել է մարզպետի պաշտոնը:

Մարզում ՔՊ-ի մյուս թևը գլխավորում է հնաբնակներից ևս մեկը՝ Էջմիածնի համայնքապետ Դիանա Գասպարյանը: ԽԾԲ-ի դեմ պայքար հայտարարած քաղաքապետը, ով պետք է վերացներ նման բարքերը, համայնքից որոշում է կայացնում, որով 306240 դրամով հողամաս է վաճառվել մի քաղաքացու, ով գրանցված է այն նույն հասցեում, ինչ 2012-ին Էջմիածնի ավագանու անդամ հանդիսացող անձը:

Դիանա Գասպարյանն էլ ավելի հեռուն է գնացել և ցանկանում է ընտրվել համայնքների միության նախագահ, բնականաբար, հավելյալ լծակներ ձեռք բերելու նպատակով: Այս տարվա մայիսի 24-ին, միության ընդհանուր ժողովին ՔՊ-ական համայնքապետերը մասնակցելու էին եկել, որպեսզի իրենց ցանկալի թեկնածուին ընտրեին՝ որպես միության նախագահ, բայց, ըստ միության գործող կանոնադրության, ՔՊ-ական որեւէ թեկնածու չէր համապատասխանում կառույցի նախագահի համար առաջադրված չափանիշներին։ Գասպարյանը, ի դեպ, քննարկմանն ակտիվ ելույթ ունեցողներից ու գործող կանոնադրության դեմ արտահայտվողներից էր։ Մամուլի տեղեկություններով՝ ժամկետների խախտմամբ ու ուշացումով, կանոնադրության մեջ փոփոխություններ անելու առաջարկներով Արտաշատի քաղաքապետն էր հանդես եկել։ Փոփոխությունը, սակայն, ձայների ոչ բավարար լինելու պատճառով (29 համայնքապետ էր կողմ) չանցավ, միության ղեկավարի ընտրությունն էլ հետաձգվեց։ Սակայն, Գասպարյանը, դժվար թե, հրաժարվի իր մտքից:

Արմավիրում ՔՊ-ի մյուս թևը գլխավորում է Վահրամ Խաչատրյանը՝ Մեծամորի համայնքապետը:  2018-ի իշխանափոխության օրերին Վահրամ Խաչատրյանը առաջիններից էր, որ փոխեց նաեւ կուսակցական պատկանելիությունը՝ իր տեղն ու դերը, նաեւ զարգացման հեռանկարը՝ ապահովելով կրկին իշխող, բայց տրամագծորեն այլ գաղափարախոսություն դավանող կուսակցության մեջ: 2021 թվականի  հունիսի 29-ին Վահրամ Խաչատրյանը նշանակվել էր Արմավիրի մարզպետի տեղակալ: Նոյեմբերի 2-ին էլ նշանակվեց Մեծամոր համայնքի ղեկավարի ժամանակավոր պաշտոնակատար:

Այսպիսով, տեսնում ենք, որ Արմավիրում պայքարը ընթանում է հիմնականում հնաբնակ ՔՊ-ականների միջև և գուցե այստեղ այդ պայքարը այնքան ցայտուն չէ, ինչպես մյուս մարզերում, սակայն այստեղ էլ ՔՊ-ին չի հաջողվել զերծ մնալ հեղափոխականներին ոչ հարիր նման երևույթներից...