Հոգեբանը նշել է, թե ինչպես մայրիկները կարող են հաղթահարել էմոցիոնալ սպառվածությունը

Մայրությունը հաճախ կապված է հոգեբանական տարածության սահմանափակման, մեկուսացման հետ, որով պայմանավորված՝ կինը կարող է դյուրագրգիռ լինել, հոգնածություն և ապատիա ունենալ, իսկ երբեմն նույնիսկ ագրեսիա և զայրույթ դրսևորել երեխայի և ընտանիքի մյուս անդամների նկատմամբ։

Ավելորդ էմոցիոնալ և ֆիզիկական սթրեսը, լրացուցիչ պատասխանատվությունը, որ ծնողները կրում են երեխայի ծննդյան հետ կապված, կարող են հանգեցնել հոգեբանական «այրման»: Ըստ Aktion Education-ի հոգեբան Եկատերինա Կոմարովայի՝ կանայք ավելի շատ են հակված հոգեբանական սպառվածության, քանի որ ամենաշատն են ներգրավված երեխաների խնամքի մեջ: Փորձագետը թվարկել է այրման նշանները, ինչպես նաև մի քանի խորհուրդ տվել, թե ինչպես կարելի է նորմալացնել ձեր վիճակը։

Դրա նշանների թվում Կոմարովան նշել է մշտական վախերը, երեխայի համար անհանգստությունը, լացելու անընդհատ ցանկությունը, դատարկության զգացումը, հիշողության վատացումն ու ուշադրության կորուստը, հետաքրքրության կորուստը շրջապատի հանդեպ, քնի խանգարումը, մշտական հոգնածության զգացումը, սեփական ագրեսիան կառավարելու անկարողությունն ու ինքն իր մասին հոգ տանելու ցանկության բացակայությունը:

Եթե ​​կա հուզական այրման կասկած, հոգեբանը խորհուրդ է տվել կանանց փորձել ավելի շատ ժամանակ տրամադրել իրենց և լսել իրենց կարիքները, օգնություն խնդրել մասնագետներից։ Նա նաև խոսել է մի քանի ինքնաբուժման տեխնիկայի մասին:

«Հետևեք ձեր ցանկություններին այն պահերին, երբ դուք զգում եք գրգռվածություն, հուսահատություն, զայրույթ կամ ձանձրույթ, կարոտ, և երեխան համառորեն ուշադրություն է խնդրում։ Ամեն ինչ կարող է սպասել: Գրգռվածության պահին ինքներդ ձեզ հարցրեք. «Ի՞նչ եմ զգում հիմա», «Ինչո՞վ է պայմանավորված իմ լարվածությունը», «Ինչպե՞ս կարող եմ ինքս ինձ օգնել հիմա»: Գիտակցաբար շնչեք 3 րոպե երկար արտաշնչումով և երկար դադարներով»,- խորհուրդ է տվել Կոմարովան՝ հավելելով, որ դա կօգնի ավելի լավ զգալ։

Մասնագետի կարծիքով՝ կարևոր է երեխային ցույց տալ նրա հետ շփվելուց դադար վերցնելու, մենակ մնալու կամ գոնե լռության մեջ մնալու ցանկությունը։ Միևնույն ժամանակ, հարկ է բացատրել, որ ինքդ քեզ հետ մենակ մնալու ցանկությունը հավասար չէ «Ես քեզ այլևս չեմ սիրում, ես քո կարիքը չունեմ» արտահայտություններին: Երեխան պետք է հասկանա, որ մայրն էլ է հոգնել։

Սպառվածությունըը հաղթահարելու մեկ այլ միջոց, ըստ մասնագետի, սիրելիների հետ զգացմունքներով կիսվելն է և կանոնավոր՝ առնվազն 10-15 րոպե հատկացնելը ձեր սիրելի գործին:

«Սա կարող է լինել վարժություն, մեդիտացիա, հանգստի վարժություններ, արտ-թերապիա, սերիա դիտել», - թվարկել է Կոմարովան:

Եթե ​​խնդիրը հնարավոր չէ ինքնուրույն լուծել, Կոմարովան խորհուրդ է տվել դիմել հոգեբանի: