ՔՊ ճամբարին հարած նախկին ՀՀԿ-ական Հովհաննես Հովեյանը պարապուրդի է մատնված

Դեկտեմբերի 23-ին Մարտունի քաղաքի մշակույթի պալատում տեղի ունեցավ Մարտունի խոշորացված համայնքի նորընտիր ղեկավար Հովհաննես Հովեյանի երդմնակալության եւ պաշտոնը ստանձնելու հանդիսավոր արարողությունը։ Այդ օրվանից հետո, Հովեյանը կարելի է ասել, ստվերում է և զանգվածին լրատվամիջոցները առիթ չեն ունենում անդրադառնալու վերջինիս մասնագիտական բուռն գործունեությանը:

Եվ այսպես, մեկ տարի առաջ ընտրարշավի ընթացքում Հովհաննես Հովեյանը հայտարարում էր, որ Մարտունիում առկա են մի շարք առաջնային խնդիրների, որոնց լուծմամբ էլ ինքը զբաղվելու է` ընտրվելու դեպքում: Այդ խնդիրներն էին՝  ներհամայնքային ճանապարհներ, խմելու ջրագծերի և ոռոգման համակարգերի բարելավման խնդիրներ, փողոցային լուսավորման, մանկապարտեզների, սպորտային դպրոցների, աղբահանության և բազմաթիվ այլ խնդիրներ, որոնք հրատապ լուծման անհրաժեշտություն ունեն: Նաև խոստացել էր, որ իր ղեկավարած թիմը  աջակցելու է գյուղմթերքների վերամշակմանը, արտադրությունների ստեղծմանը, սառնարանների կառուցմանը, ֆերմերային տնտեսությունների ստեղծմանը՝ համագործակցելով որոշ գործարարների հետ՝  տարբեր արտադրամասերի կառուցմանը:

Իսկ այժմ դիտարկենք, թե այս ներկայացված խնդիրներից քանիսն են մեկ տարվա ընթացքում լուծում ստացել: Դիցուք՝ Մարտունու համայնքապետարանի պաշտոնական կայքեջից ծանոթանում ենք համայնքապետարանի գործունեությանը և պարզ է դառնում, որ մեկ տարվա ընթացքում Հովեյանը և թիմը զբաղված են եղել՝ պարի երեկո կազմակերպելով, պարային համույթի մրցանակների հանձնմամբ, խոշոր եղջերավոր կենդանիների համարակալմամբ, МАЗ մակնիշի ինքնաթափ ավտոմեքենա ձեռք բերելով, վերանորոգվել է բուն համայնքապետարանի շենքը, ասֆալտապատվել են մի շարք փողոցներ, անց է կացվել երգող վրձին ցուցահանդեսը, կազմակերպվել է ներհամայնքային վազքի մրցույթ:

Այնքան էլ հասկանալի չէ, թե վերը նշված տիտանական աշխատանքը ինչ աղերս ունի դիցուք՝ տարբեր արտադրամասերի ստեղծման, աղբահանության խնդրի լուծման կամ ֆերմերային տնտեսությունների և նոր աշխատատեղերի ստեղծման հետ: Մեկ հայացքը համայնքի պաշտոնական էջին և ծանոթությունը լրահոսին թույլ է տալիս եզրակացնել, որ մեկ տարի շարունակ Մարտունիում, անշուշտ, աշխատանքներ իրականացվել են, սակայն նախընտրական խոստումների իրականացումից համայնքապետ Հովեյանը և թիմը դեռևս անչափ հեռու են:

Սակայն, Հովեյանը ընտրվել է և պաշտոնավարում է: Ի դեպ, վերջինիս պաշտոնավարման հետ կապված մամուլը ուշագրավ տեղեկություններ էր տարածել։ Մասնավորապես, նշվում էր, որ նախկին ՀՀԿ-ական Հովհաննես Հովեյանի հարցում ՔՊ-ականները երկար-բարակ մտորելու պատճառ չեն ունեցել։ Ավելին՝ այս կերպ Փաշինյանը Հովեյան ընտանիքի՝ ժամանակին արած լավության դիմաց վարձահատույց է լինում: Ըստ տեղեկությունների՝ երբ 2018-ին Աննա Հակոբյանը մեկնել էր Ռուսաստան՝ հանդիպելու ռուսաստանաբնակ խոշոր գործարարների հետ, որևէ մեկը նրան չէր ընդունել, չէր պատվել, բացի Հովեյանի՝ Տյումենում ապրող մեծահարուստ բիզնեսմեն եղբորից՝ Աբրահամ Հովեյանից: Որպեսզի եղբայրն ավելի հպարտ ու ինքնագոհ քայլի Վարդենիկում, ասում են, նա Փաշինյանին բարձր դասի զրահապատ մեքենա էր նվիրել: ՀՀ վարչապետն էլ, լավության առավելագույն չափ սահմանելով, Աբրահամ Հովեյանի մի եղբորը բարձր պաշտոն է տվել պետական ապարատում, իսկ մյուսին՝ Հովհաննես Հովեյանին, Մարտունու քաղաքապետ դառնալու հնարավորություն ընձեռել: Հնարավորությունից վերջինս սակայն, ինչպես տեսնում ենք, դեռ ի շահ համայնքի չի օգտվում...