ՔՊ-ականների ճոխ ծախսերը. պաշտոնյաները բարեկեցիկ կյանքի վրա չեն խնայո՞ւմ

Հայաստանի Հանրապետության 2019-2022 թթ․ հակակոռուպցիոն ռազմավարության երկրորդ ոլորտը վերաբերում է կոռուպցիայի կանխարգելմանը։ Այս ոլորտին ուղղված գործողությամբ նախատեսված է գույքի, եկամուտների և շահերի հայտարարագրման համակարգի կատարելագործում, ծախսերի հայտարարագրման համակարգի ներդրում։ Սակայն, հպանցիկ հայացքը հեղափոխական պաշտոնյաների հայտարարագրերին խորը կասկածներ է առաջացնում կապված այդ ներդրված համակարգի կայացման հետ։ Նիկոլ Փաշինյանը խոստանում էր բացառել կոռուպցիոն ռիսկերը և ստանալ աշխարհի ամենակատարյալ հայտարարագրման համակարգը։ Ակնհայտ է, որ ինչ-որ բան այնպես չի գնացել...

Դիցուք՝ ՔՊ-ական պատգամավոր Արմեն Խաչատրյանը հայտարարագրել է 50 հազար ԱՄՆ դոլարի ծախս, սակայն չի բարիհաճել նշել, թե այդ ինչ ճոխ ծախս է և ինչին է ուղղվել։

ՊՎԾ պետ Ռոմանոս Պետրոսյանի 2019 թվականի հայտարարագրում նշվում է 35,000,000.00 չափով ստացած վարկը, որի մարմանն ուղղված գումարները պետք է դիտարկվեին որպես ծախս և հայտարարագրվեին, սակայն ոչ 2020 թվականի, ոչ էլ 2021 թվականի հայտարարագրերում այդ մասին չի հիշատակվում։ Մնում է ենթադրել, որ Պետրոսյանի վարկը այդպես էլ մնացել է չմարված, միայն թե հարց է` ինչպես են այդպիսի անպատասխանատու վարկառուին 2021-ին կրկին վարկ տվել։

Արսեն Թորոսյանը, մասնավորապես, նշել է 17,750,000.00 ՀՀ դրամի հասնող ծախս, ծախսի տեսակն էլ՝  2 մլն ՀՀ դրամը կամ դրան համարժեք արտարժույթը գերազանցող այլ միանվագ ծախսեր:

Ջերմուկի համայնքապետ Վահագն Արսենյանի ծախսերի հայտարարագիրը նույնպես անչափ ուշագրավ է: Ահա այն:

Ինչպես տեսնում ենք՝ նա անշարժ գույքի վերանորոգման վրա ծախսել է 3,878,414.00 ռուսական ռուբլի, 60,000.00 ԱՄՆ դոլար:

Երևանի քաղաքապետ Հրաչյա Սարգսյանի կատարված ծախսերը կազմել են 1,785,590.00 ՀՀ դրամ, այդ գումարը ուղղվել է վարկի մարմանը:

ՊԵԿ նախագահ Ռուստամ Բադասյանի ծախսերը ընդհանուր առմամբ կազմել են 13,671,120.00 դրամ, այդ գումարը ուղղվել է անշարժ գույքի վերանորոգմանն ու վարկի մարմանը:

Իմքայլական պատգամավոր Գուրգեն Արսենյանը ծախսել է 25,000,000.00 դրամ: Այդ գումարը իր մեջ ներառում է՝ հանգստի համար կատարած ճանապարհածախսը, նվիրատվության կամ օգնության կարգով տրված գույք, որի միանվագ արժեքը հաշվետու ժամանակահատվածում գերազանցում է 2 միլիոն ՀՀ դրամը կամ դրան համարժեք արտարժույթը: Ի դեպ, այդ գումարը կազմում է 48,000.00 ԱՄՆ դոլար: Եվ անշարժ գույքի վերանորոգման համար կատարված ծախսերը:

Ինչպես տեսնում ենք՝ չնայած երկրում տնտեսական վիճակը գնալով վատթարանում է, առկա է հուժկու գնաճ և քաղաքացիները պարբերաբար դժգոհում են, որ ծայրը ծայրին հասցնելն անգամ դժվարացել է՝ հայրենի պաշտոնյաների կատարած ծախսերը հուշում են, որ առնվազն նրանց համար հեղափոխությունը իսկապես կյանքի որակ է փոխել...