Ինչով է աչքի ընկել Գարիկ Սարգսյանի կուրսեցի փոխմարզպետը. Արտավազդ Նազարեթյանի «արկածներն» Արարատում

Շարունակելով ընթերցողների ուշադրությանը ներկայացնել հետհեղափոխական Հայաստանի փոխմարզպետներին և վերջինիս գործունեության առավել ուշագրավ դրվագները՝ այսօր կանդրադառնանք Արարատի փոխմարզպետ Արտավազդ Նազարեթյանին:

Նշենք, որ վերջինս ընդհանրապես հնաբնակներից է, նրա փոխմարզպետության օրոք երեք մարզպետ է փոխվել, իսկ նշանակվել է նա 2018-ին, ինչը, իհարկե, տեղի չի ունեցել առանց սկանդալի: Բանն այն է, որ վերջինիս ներկայացնելուց Արարատի այն ժամանակվա մարզպետը չէր էլ թաքցրել, որ իրենք ծանոթ են և ունեն ընկերական կապեր: Արտավազդ Նազարեթյանը Սարգսյանի կուրսեցին է և ընկերը:

Հարցին, թե արդյոք դա կոռուպցիոն ռիսկ իր մեջ չի պարունակում, Սարգսյանը այն ժամանակ ասել էր. «Ոչ, ովոհետեւ երբ ՔՊ կուսակցությունը հիմնվել է, այս մարդն ակտիվ մեզ հետ ամեն հարցում զբաղվել է: Ցանկացած հարցում աջակից է եղել մեր ցանկացած քայլին»: Հարցին, թե կարո՞ղ է նշել մի դրական բան, որի համար նա նշանակվել է փոխմարզպետ, Գարիկ Սարգսյանը պատասխանեց. «Այդպես չի գնահատվում տեղակալ նշանակելը: Նա գաղափարակից ընկեր է մեզ համար եւ այդ պատճառով նշանակվել է այդ պաշտոնին»: Նա հավելել էր, որ դա կոռուպցիա չի համարում:

Բավական ուշագրավ կերպով է հեղափոխությունից հետո փոխվել Նազարեթյանի սոցիալական դրությունը: 2018-ին նա հայտարարագրել էր 10,000.00 Ամն դոլար և 2,500,000.00 դրամ և 321,000.00 դրամ աշխատավարձ: Նախորդ տարվա դրությամբ նա ունի 770,451.00 դրամի փոխառություն, բանկային հաշիվների մնացորդները կազմում են 2,200,000.00 , 160,000.00 և 93,220.00 դրամ, իսկ եկամուտները աշխատավարձից՝ 9,844,484.00 դրամ:

Նազարեթյանի անունը այս ընթացքում հայտնվեց մեկ սկանդալի կիզակետում: Մամուլը գրել էր, որ Արարատի մարզի Զորակ (Մասիսի տարածաշրջան) համայնքի Մոնթե Մելքոնյանի անվան միջնակարգ դպրոցի տնօրեն Տիգրան Բաբախանյանը աշխատանքից ազատման դիմում էր գրել՝ ներկայիս իշխանության քաղաքական տեսակետները չկիսելու համար։ Բաբախանյանը ոչ թե սեփական նախաձեռնությամբ, այլ Արարատի մարզպետարանի ճնշումների ներքո է դիմումը գրել։ Դրանից հետո հայտարարվել էր մրցույթ՝ դպրոցի տնօրենի թափուր պաշտոնի համար։ Սակայն, մրցույթը չէր կայացել, իսկ թեկնածուն մեկն էր՝ Լաուրա Գասպարյանը։ 

Նշենք, որ նույն մամուլի տեղեկություններով՝ արդեն նախկին մարզպետ Ռազմիկ Թևոնյանը և նրա տեղակալ Արտավազդ Նազարեթյանը շատ կոնկրետ «ընկել էին» տնօրենների հետևից և ընտրություններից առաջ փորձում էին ազատվել մարզի ըմբոստ և իրենց հրահանգները չկատարող տնօրեններից։ Դպրոցի տնօրեններին «կոնտրոլ» անելու պարտականությունը դրված է եղել հենց Նազարեթյանի վրա։ Այս գործընթացին ակտիվ մասնակցել է նաեւ Արարատի նախկին մարզպետ Գարիկ Սարգսյանը։

Շարունակելի...