Ստամբուլում հզոր երկրաշարժի դեպքում մասշտաբային փլուզումներ են կանխատեսվում

Ստամբուլում 7 բալից ավելի ուժգնությամբ երկրաշարժը կարող է փլուզել մոտ 90 հազար շենք, ասել է քաղաքապետարանի շրջակա միջավայրի պահպանության և վերահսկողության վարչության ղեկավար Այշեն Էրդինչլերը։ Նա նշել է, որ եթե դա տեղի ունենա, ապա քաղաքում կառաջանա 50-ից 60 մլն տոննա բեկոր: Այս հարցը քննարկվել է Ստամբուլի քաղաքապետարանի՝ երկրաշարժին նախապատրաստվելու ծրագրերի պրեզենտացիայի ժամանակ, հայտնում է «Известия»-ն։

Ասենք 7,5 բալ ուժգնությամբ երկրաշարժից հետո առաջին փուլում կարող է փլուզվել 90 հազար շենք։ Արդյունքում կառաջանա 50-60 մլն տոննա բեկոր, ինչը կպահանջի 30-50 մլն խորանարդ մետր պահեստներ՝ նախքան ուտիլիզացիան պահելու համար, ասել է Էրդինչլերը։

Ստամբուլի քաղաքապետ Էքրեմ Իմամօղլուն իր հերթին ասել է, որ նման հզորության երկրաշարժը կազդի մոտավորապես 260,000 շենքերի վրա։ Նա ընդգծել է, որ հանգամանքների նման համակցությամբ 4,5 մլն քաղաքացի կունենա ժամանակավոր կացարանի կարիք։ Քաղաքապետի խոսքով՝ այժմ հնարավոր չէ ստույգ կանխատեսել, թե երբ տեղի կունենա երկրաշարժ, սակայն կատակլիզմի հետ բախումն անխուսափելի է։