Իսրայելի ՊՆ-ն հայտարարել է միջուկային զենքի պատճառով Իրանի վերաբերյալ «կարևոր որոշումների» մասին

Իրանի՝ միջուկային զենք ձեռք բերելու ձգտումը պահանջում է, որ Իսրայելը պատրաստ լինի ցանկացած գործողության, հիմա այն պահն է, երբ անհրաժեշտ կլինի կայացնել կարևոր որոշումներ։ Այս մասին հինգշաբթի օրը հայտարարել է Իսրայելի պաշտպանության նախարար Յոավ Գալանթը՝ իր ամերիկացի գործընկեր Լլոյդ Օսթինի հետ հանդիպումից հետո, ով այցով ժամանել է Իսրայել։ Այս մասին հաղորդում է ՏԱՍՍ-ը։

«Այսօր մենք գտնվում ենք ժամանակի կրիտիկական պահին, մոտ ապագայում մեզ անհրաժեշտ կլինի հրատապ և կարևոր որոշումներ կայացնել: Իրանը նպատակ ունի ձեռք բերել միջուկային զենք և սպառնալ ոչ միայն Իսրայելին, այլև ողջ աշխարհին»,- ասել է Գալանթը: «Իրանական միջուկային սպառնալիքը պահանջում է, որ մենք պատրաստ լինենք ցանկացած գործողության, ես կրկնում եմ և շեշտում՝ մենք պետք է պատրաստ լինենք գործողության ցանկացած տարբերակի»,- հավելել է նա՝ նշելով, որ Իսրայելը թույլ չի տա Իրանին ձեռք բերել զանգվածային ոչնչացման զենք, որը կսպառնա հրեական պետությանը:

«Մենք պետք է պատրաստ լինենք գործողությունների ցանկացած տարբերակի, բոլոր տարբերակները դիտարկվում են: Պետք է հստակ ասել մեկ բան՝ Իսրայելը թույլ չի տա Իրանին ունենալ զանգվածային ոչնչացման զենք, միջուկային զենք՝ ուղղված Իսրայելին»,- ասել է պաշտպանության նախարարը։ 

Գալանթն ընդգծել է, որ ԱՄՆ-ն և Իսրայելը պետք է միասին աշխատեն, որպեսզի առաջին հերթին թույլ չտան Իրանին միջուկային զենք ձեռք բերել: Եթե ​​Թեհրանը, այնուամենայնիվ, նման զենքի հասանելիություն ստանա, դա կարող է հանգեցնել տարածաշրջանի ապակայունացմանը, կարծում է իսրայելցի նախարարը։