Շիրակի մարզում դատավորների հաճախակի տեղափոխությունների պատճառով ՔԿՀ-ներում աղմուկ է հասունանում. Յայլոյան

Շիրակի մարզում դատավորների հաճախակի տեղափոխությունների պատճառով ՔԿՀ-ներում աղմուկ է հասունանում։ Այս մասին հրավիրված մամուլի ասուլիսին ասաց շիրակցի փաստաբան Թամարա Յալյոյանը։

Փաստաբանը հայտնեց, որ իր պաշտպանյալներից մեկը, որը դիմել էր իր խափանման միջոց կալանավորումը փոխելու վերաբերյալ, սակայն երբ իրեն հայտնել էին, որ դատավորը Շիրակի մարզից տեղափոխվել է այլ դատարան, ինչի հետևանքով իր խափանման միջոցի փոփոխման հարցը չի լսվելու, անձը հայտարարեց, որ հացադուլ կհայտարարի և միայն պաշտպանների խնդրանքով է, որ նա առ այժմ նման ծայրահեղ միջոցների չի գնացել։

«ՔԿՀ-ներում կան մարդիկ, որոնք իսկապես հոգնել են այդ իրավիճակից։ Պաշտպանյալներիցս ոմանք ասում են, որ այնքան են նստել, որ պատժի ժամկետը լրանում է, մինչդեռ, մինչ այդ նրանք արդարացման ակնկալիքներ ունեին, իսկ հիմա, երբ պատժի ժամկետը լրացել է, այդքան ժամանակ ինքը կալանավայրում է եղել, ինչ իմաստ ունի արդեն իր վերաբերյալ դատական ակտ կայացնելը։ Կան մարդիկ, որոնք խիստ դժգոհում են, որ ՔԿՀ-ից մեքենայով պարբերաբար գալիս են դատարան, բայց նիստերը հետաձգվում են, կրկին ստիպված վերադառնում են»,- նշեց փաստաբանը՝ հավելելով, որ կալանավայրերում կան մարդիկ, որոնք ցանկանում են աղմուկ բարձրացնել, սակայն դա հնարավոր է եղել կանխել փաստաբանների հորդորներից հետո։

Նրա խոսքով՝ կան բազմաթիվ գործեր, որոնցով մարդիկ գրավի դիմաց ազատության մեջ են, գրավի գումարը վճարելու համար պարտքով գումար է վերցրել, հիմա արդեն տոկոսը պետք է վճարի, պետք է դատական գործընթացն ավարտվի, որ ինքը կարողանա վճարել։

«Գործ ունեմ, որ մարդու կինը քաղցկեղ ունի, ինքը սպասում է, որ անկախ գործի ելքից, ինքը ստանա գրավի գումարը, որ կարողանա վճարել կնոջ բուժման համար, բայց այդ գումարը չի վերադարձվում, որովհետև չորս դատավոր է փոխվել»,- նշեց Յայլոյանը։

Ինչ վերաբերում է քաղաքացիական գործերին, ապա փաստաբանը հայտնեց, որ կան գործեր, որոնցով պատասխանող կողմը մահացել է, վեցամսյա ժամկետով պետք է սպասել՝ մինչև իրավահաջորդության հարց լուծվի, հայցվոր կողմը դժգոհում է, թե ինչու պետք է գործը երկու տարուց ավել լինի, որ կողմերը մահանան։ Գործեր կան ալիմենտի վերաբերյալ, մարդը դիմել է դատարան երեխայի հացի փողի համար, որ կարողանան հաց դիմել, բայց գործը երկու տարուց ավելի է, ինչ քննվում է։

«Գործեր կան ամուսնալուծության վերաբերյալ, երբ կինն այլ մարդու հետ է ամուսնացել, արդեն հղի է այլ տղամարդուց, ցանկանում է, որ արագ ամուսնալուծվի, որ երեխան ծնվի՝ երեխայի հայրը լինի որպես հայր, բայց գործը դեռ նախնական քննության փուլում է։ Մարդիկ հասկանում են, որ դատարաններին դիմելն անարդյունավետ է, որովհետև դատավորները կարող են պարբերաբար փոխվել»,- նշեց փաստաբանը։