Երաժշտությունը իմ հույզերի արտացոլանքն է առ Աստված․ Վարդան Պողոսյան

Ջութակահար Վարդան Պողոսյանը վերջերս հանրության դատին հանձնեց իր նոր՝ «Պոեմ» ստեղծագործությունը։ Ձեզ ենք ներկայացնում երիտասարդ ջութակահարի գործունեության, ձեռքբերումների և ծրագրերի մասին հարցազրույցը։

1. Ի՞նչ է Ձեզ համար երաժշտությունը

Երաժշտությունն ինձ համար ինքնադրսևորման, ինչու չէ նաև ինքնաճանաչման լավագույն միջոցն է․ երաժիշտները, ստեղծագործող անհատները հաճախ իրենց ապրումներն ու հույզերը ավելի հեշտ են կարողանում արտահայտել երաժշտության, քան բառերի միջոցով: Երաժշտությունը կրթող, զարգացնող և որոշ դեպքերում նույնիսկ ապաքինող երեւույթ է մարդկային էության համար: Երաժշտությունը իմ հույզերի արտացոլանքն է առ Աստված։

2. Ի՞նչ եք փոխանցում մարդկանց Ձեր երաժշտության միջոցով

Միշտ փորձում եմ իմ երաժշտության միջոցով մարդկանց փոխանցել զգացմունքների վառ ներկապնակ, իմ առջեւ խնդիր եմ դնում հուզել նույնիսկ ամենաքմահաճ ունկնդրին: Երաժշտասեր մարդիկ ամեն ինչ լավ տեսնում, զգում եւ հասկանում են, այդ պատճառով շատ կարեւոր է երաժշտության մեջ մաքսիմալ անկեղծ լինելը եւ երաժշտական սկզբունքներին հավատարիմ մնալը:

3. Երբեմն միայնակ շրջում ես որևէ քաղաքում և մտքումդ հնչում են երաժշտություններ, որոնք այնքա՜ն ներդաշնական են այդ քաղաքին: Ի՞նչ մեղեդիներ են պտտվում Ձեր գլխում, երբ քայլում եք հարազատ քաղաքի՝ Երևանի փողոցներով։

Հաճախ են լինում նման պահեր թե՛ Երեւանի կենտրոնում, թե՛ Հայաստանի մարզերում շրջելիս, երբ կարծես տեսարժան վայրը կամ տեսարանը քեզ հուշում է որեւէ երաժշտություն, ինչպես ֆիլմում է կադրը զուգորդվում համապատասխան երաժշտությամբ։ Մեր հայաստանյան գեղեցիկ բնապատկերներին համահունչ մեղեդիները եւ երաժշտությունները շատ են, դրանցից կնշեմ իմ ֆավորիտներից մի քանիսը՝ Էդուարդ Բաղդասարյանի «Նոկտյուրն», Ավետիս Բերբերյանի «Կարոտ», Արամ Խաչատրյանի «Նոկտյուրն», Առնո Բաբաջանյանի «Անուրջներ» ստեղծագործությունները։

4. Դուք պրոֆեսիոնալ երաժիշտ եք, ինչպե՞ս հայտնվեցիք երաժշտության աշխարհում:

Պրոֆեսիոնալ երաժիշտ դառնալու բարդ ու երկարատեւ ուղին սկսվեց վաղ մանկուց, երբ ծնողներս նկատեցին իմ երաժշտական ընդունակությունները, սերն ու հետաքրքրասիրությունը երաժշտության հանդեպ եւ 7 տարեկանս դեռ չլրացած ընդունեցին Արմեն Տիգրանյանի անվան երաժշտական դպրոց: Պատանեկան մրցույթներում հաջողություններ գրանցելով եւ դպրոցը գերազանց ավարտելով, ուսումս շարունակեցի Ռոմանոս Մելիքյանի անվան երաժշտական ուսումնարանում, որտեղ ևս ունեցա հաջողություններ՝ հաղթելով ջութակահարների հանրապետական մրցույթում։ Ուսումնարանն ավարտելուց հետո ուսումս շարունակեցի Երեւանի Կոմիտասի անվան պետական կոնսերվատորիայում անվանի պրոֆեսոր՝ ջութակահար Արտաշես Մկրտչյանի դասարանում։ Այդ տարիներին ունեցա բազմաթիվ համերգներ, մասնակցեցի տարբեր փառատոների՝ շարունակելով ուսումս նաեւ ԵՊԿ-ի մագիստրատուրայի բաժնում: Ուսումս ավարտելուց հետո սկսեցի հանդես գալ որպես համերգային ջութակահար, հաջողված համագործակցություններ ունեցա բազմաթիվ ֆիլմերի ստեղծագործական կազմերի հետ, ներկայանալով հայտնի ֆիլմերի սաունդթրեքներում, համերգային շրջագայության (Եվրոպա, Չինաստան) մեկնեցի ամերիկահայ ջութակահար Աշոտ Տիգրանյանի հիմնած հայ-ամերիկյան «CCCO» նվագախմբի հետ, մասնակցեցի բազմաթիվ երաժշտական խոշոր նախագծերի, ձայնագրություններ եւ տեսահոլովակներ թողարկեցի՝ այսպես հայտնվելով երաժշտության հարուստ եւ հետաքրքիր աշխարհում:

5.Ինչ եք կարծում, ջութակը որպես երաժշտական գործիք համահո՞ւնչ է ցանկացած երաժշտական ժանրի հետ, թե կան ժանրեր, որտեղ այս գործիքը անհամատեղելի է:

Ջութակը լինելով երաժշտական գործիքների թագուհին, կարելի է ասել, համատեղելի է բոլոր երաժշտական ժանրերում, դժվարանում եմ առանձնացնել որեւէ ժանր որտեղ ջութակի մասնակցությունը կարող է խանգարել, մնացածը ճաշակի հարց է։

6.Երաժշտության մեջ կա՞ մի այնպիսի բան, որը երբեք չեք փորձել, բայց կցանկանայիք փորձել:

Երբեք չեմ փորձել երգել, բայց ցանկություն էլ չունեմ։ Կարծում եմ իմ գործիքը հնչում է բոլոր բառերի փոխարեն․․․

7. Մենք հաճախ ենք լսում, որ մեծ հաջողությունների համար միայն տաղանդավոր երաժիշտ լինելը բավական չէ, մեծ վերելքների համար նաև հիշվող տեսահոլովակներ, բազմաթիվ հարցազրույցներ, և ընդհանրապես, մեծ ակտիվություն է պետք։ Համաձա՞յն եք:

Իհարկե, համաձայն եմ: Այսօրվա մեր իրականության մեջ տաղանդավոր լինելը ամենեւին չի երաշխավորում հաջողություն ունենալը։ Ժամանակի պահանջները փոխվել են, եթե տարիներ առաջ հանրաճանաչություն ունենալու համար բավական էր մի քանի տեսահոլովակ ունենալ, հեռուստատեսությամբ հանդես գալ եւ թերթերում տպագրվել, ապա այսօր ճանաչում ձեռք բերելու համար պարտադիր է վիրտուալ տիրույթի սոցիալական հարթակներում ակտիվ լինել, լսարան ստեղծել, մեծ քանակի հետեւորդներ ունենալ: Արտիստները արդեն վիրտուալ հարթակներում բլոգերներին հատուկ մասնագիտական նրբությունների պետք է տիրապետեն, որպեսզի կարողանան ակտիվ պահել իրենց ստեղծած բազմահազարանոց լսարանները: Ցավոք սրտի ոչ բոլոր տաղանդավոր մարդիկ են հարմարվում մերօրյա այս պահանջներին, եւ շատ շնորհալի մարդկանց հանրությունը այդպես էլ չի ճանաչում։

8. Խոսեցինք տեսահոլովակների, երաժշտական ակտիվ գործունեության անհրաժեշտությունից՝ շարունակելով թեման խնդրում եմ անդրադառնալ Ձեր վերջին՝ «Պոեմ» տեսահոլովակին:

«Պոեմ»-ը շատ տաղանդավոր կոմպոզիտոր, դաշնակահար եւ իմ մտերիմ ընկեր Արթուր Թադեւոսյանի հեղինակային ստեղծագործությունն է, որը նա գրել է համավարակի տարիներին: Ի սկզբանե ստեղծագործությունը Արթուրը գրել էր դաշնամուրի համար, բայց առաջարկեց ինձ ջութակով նվագել, եւ ինչպես նա է ասում՝ հասկացավ, որ այս ստեղծագործությունը գրված է հենց ջութակի համար։ Անցած տարի սկսեցինք նախապատրաստական աշխատանքները, գործիքավորման եւ ձայնագրման փուլերը, ի դեպ գործիքավորման հեղինակը նույնպես Արթուր Թադեւոսյանն է, իսկ ձայնագրման եւ Mix Mastering-ի աշխատանքներն իրականացրել է տաղանդավոր երաժիշտ եւ մեր լավ ընկեր Արամ Սարգսյանը։ Դժվարանում էինք ստեղծագործության անվան ընտրության հարցում, հետո ես զուգահեռներ տանելով մարդու ապրած կյանքի եւ էմոցիոնալ առումով հարուստ երաժշտության միջեւ, որոշեցի անվանել «Պոեմ», հենվելով այն գաղափարի վրա, որ ցանկացած մարդու կյանք նման է մի յուրահատուկ պոեմի՝ կյանքում տեղի ունեցող իրադարձություններով և ապրումներով, ինչպես մեր երաժշտությունը՝ գեղեցիկ, բայց հաճախ բազում հակասական զգացմունքներով: Այսպես ծնվեց «Պոեմ»-ը, եւ այս տարվա սկզբին կարողացանք ավարտին հասցնել տեսահոլովակի նկարահանման աշխատանքները ու ներկայացնել հանրությանը։

Տեսահոլովակի ռեժիսորը Արթուր Գեղամյանն է, օպերատորը Արթուր Օրդոյանն է, տեսանյութի մոնտաժն ու ձեւավորումը իրականացրել է Սոնա Խաչատրյանը: Ուզում եմ շնորհակալություն հայտնել բոլոր այն մարդկանց, ովքեր իրենց մասնակցությունն են ունեցել եւ օգնել են «Պոեմ» ստեղծագործության եւ տեսահոլովակի կայացման գործում