«Երիտասարդության մասին» օրինագծի քննարկում ԵՊՀ-ում

Դեկտեմբերի 23-ին ԵՊՀ Պալեանների անվան դահլիճում «Երիտասարդական խորհրդարանը» կազմակերպել էր «Երիտասարդության մասին» օրենքի նախագծի քննարկում, որը հեղինակել էր «Երիտասարդական խորհրդարանի» գործող նախագահ Կառլեն Խաչատրյանը:

Քննարկմանը մասնակցում էին ՀՀ ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արտակ Դավթյանը եւ հանձնաժողովի անդամ Արտակ Զաքարյանը:

ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արտակ Դավթյանը քննարկման մասնակիցներին նախ շնորհավորեց դեկտեմբերի 22-ին Ֆրանսիայի Ազգային ժողովի կողմից ընդունված ցեղասպանությունների ժխտումը քրեականացնող օրինագծի ընդունման կապակցությամբ, ապա անդրադարձավ քննարկման ներկայացված օրինագծին:

Նա տեղեկացրեց, որ այժմ խորհրդարանում շրջանառության մեջ է գտնվում ԱԺ պատգամավոր Վիկտոր Դալլաքյանի հեղինակած «Երիտասարդության մասին» օրինագիծը, ինչպես նաեւ ԱԺ է ներկայացվել ՀՀ կառավարության կողմից մշակված նույնանուն օրինագիծ: Պարոն Դավթյանը մասնավորապես նկատեց, որ նշված երկու նախագծերն էլ ունեն լրամշակման անհրաժեշտություն:

Անդրադառնալով «Երիտասարդական խորհրդարանում» քննարկվող օրինագծին' պարոն Դավթյանը նկատեց, որ ուսումնասիրել է օրինագիծը եւ պարզել, որ այն արտահայտում է երիտասարդությանը հուզող խնդիրները: Մաղթելով կառուցողական աշխատանք' հանձնաժողովի նախագահը հույս հայտնեց, որ առաջիկա գարնանային նստաշրջանում քննարկման կներկայացվի առավել լրամշակված եւ բարեփոխված օրինագիծ:

ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի անդամ Արտակ Զաքարյանը ողջունելով «Երիտասարդական խորհրդարանի» անդամներին եւ ուսանողներին' դրական գնահատեց օրենսդիր մարմնի հետ աշխատելու երիտասարդների մոտեցումը եւ վերաբերմունքը երիտասարդությանը հուզող խնդիրների նկատմամբ: Արտակ Զաքարյանը պատրաստակամություն հայտնեց իր հնարավորությունների սահմաններում աջակցել «Երիտասարդության մասին» օրինագծի բարեփոխմանը, որպեսզի այն լինի հնարավորինս հիմնավորված եւ զերծ հռչակագրային դրույթներից:

Տեղի ունեցավ շահագրգիռ քննարկում: Քննարկման մասնակիցները ներկայացրեցին առաջարկներ եւ դիտողություններ: