ՄԱԿ-ի խաղաղապահները վնասվածքներ են ստացել Կիպրոսի բուֆերային գոտում թուրքական ուժերի հետ բախման ժամանակ

Կիպրոսի թուրքերը ուրբաթ օրը ծեծի են ենթարկել ՄԱԿ-ի խաղաղապահների խմբին, որոնք փորձում էին կանխել ճանապարհի կառուցումը բուֆերային գոտու միջով, որը բաժանում է չճանաչված «Հյուսիսային Կիպրոսի Թուրքական Հանրապետությունը» մնացած կղզուց:

Այս մասին գրում է «Եվրոպական ճշմարտությունը»՝ հղում կատարելով AP-ին։

Միջադեպը տեղի է ունեցել Կիպրոսի հյուսիսում Արսոս գյուղից դեպի Պիլա գյուղ տանող ճանապարհի շինարարության ժամանակ, որը գտնվում է այսպես կոչված՝ Կանաչ գծում՝ բուֆերային գոտում, որը վերահսկվում է ՄԱԿ-ի ուժերի կողմից:

Կիպրոսի թուրքերի համար ճանապարհը թույլ կտա հասնել Պիլա՝ շրջանցելով Կիպրոսի բրիտանական ռազմաբազայի անցակետը։ Կիպրոսի հույները, մյուս կողմից, շինարարությունն ընկալում են որպես ռազմական նպատակ ունեցող քայլ, որի հետևում կանգնած է Թուրքիան։

Բախման ժամանակ տասնյակ կիպրացի թուրքեր հարձակվել են ՄԱԿ-ի մի քանի սլովակ և բրիտանացի զինծառայողների վրա։ Նրանցից ոմանց դեմքին հարվածներ են հասցվել. երեքը ստիպված են եղել դիմել բժշկի՝ թեթև վնասվածքների պատճառով:

Կիպրոսում ՄԱԿ-ի խաղաղապահ ուժերի ներկայացուցիչը AP-ին ասել է, որ իրենք շարունակելու են արգելափակել ճանապարհի կառուցումը ոչ բռնի մեթոդներով, քանի որ դա խախտում է ստատուս քվոն բուֆերային գոտում։

Հարձակումը դատապարտել են նաև ԵՄ բարձրաստիճան դիվանագետ Ժոզեպ Բորելը և Նիկոսիայում Ֆրանսիայի, Մեծ Բրիտանիայի և ԱՄՆ-ի առաքելությունները: Կիպրոսի կառավարությունը դատապարտել է թուրք օկուպանտների կողմից «կազմակերպված բռնությունը» և հավելել, որ կապի մեջ է ՄԱԿ-ի, ԵՄ-ի և այլ կառավարությունների հետ՝ կանխելու «թուրքական ծրագրերը»։

Այսպես կոչված՝  «Հյուսիսային Կիպրոսի Թուրքական Հանրապետության» իշխանություններն իրենց հերթին միջադեպի համար մեղադրել են ՄԱԿ-ի խաղաղապահներին՝ նրանց գործողություններն անվանելով «անընդունելի», իսկ մեղադրանքները՝ «անհիմն»։

1974 թվականին Կիպրոսում տեղի ունեցավ հեղաշրջում, որն աջակցում էր կղզու վերամիավորմանը Հունաստանին։ Ի պատասխան՝ Թուրքիան օկուպացրեց Կիպրոսի հյուսիսային հատվածը, որտեղ հետագայում հռչակվեց չճանաչված Հյուսիսային Կիպրոս պետությունը (միայն Թուրքիան է ճանաչում դրա անկախությունը)։