Էապես նվազեցվում է հարկային տեսուչ-հարկատու շփումը

Հարկ վճարողների սպասարկման որակի բարելավմանն ուղղված կարևորագույն քայլերից մեկը՝ տեսչություններում ժամանակակից սպասարկման կենտրոնների գործարկումն է: ՊԵԿ ղեկավարության կողմից հարկային տեսչությունների առջև հստակ խնդիր է դրվել. հասնել նրան, որ անկախ տարածաշրջանային պատկանելությունից, ցանկացած սպասարկման կենտրոնում հարկ վճարողներին հնարավորություն ընձեռվի իրականացնել հարկային և մաքսային ծառայությունների հետ կապված բոլոր ընթացակարգերը:

Երևանում գործող 6 և մարզերի 3 սպասարկման կենտրոններին ավելացավ ևս մեկը՝ Գյումրիի ՏՀՏ սպասարկման կենտրոնը: Երեկ նորաբաց սպասարկման կենտրոն են այցելել ՀՀ փոխվարչապետ, տարածքային կառավարման նախարար Արմեն Գևորգյանն ու ՊԵԿ նախագահ Գագիկ Խաչատրյանը: Նրանք եղել են ՏՀՏ հիմնովին վերանորոգված վարչական շենքում, ծանոթացել՝ աշխատանքային պայմաններին: Այնուհետև նորաբաց սպասարկման կենտրոնում Գագիկ Խաչատրյանն աշխատանքային խորհրդակցություն է անցկացրել Գյումրիի ՏՀՏ աշխատակիցների հետ: Գյումրիի տարածքային հարկային տեսչությունն սպասարկում է Գյումրի քաղաքի, Ամասիայի, Աշոցքի և Ախուրյանի տարածաշրջանների շուրջ 3800 գործող հարկ վճարողներին, որոնց մոտ 20 տոկոսն այսօր արդեն հանդիսանում է էլեկտրոնային եղանակով հարկ վճարող: Նշենք, որ այդ թիվը մի քանի անգամ գերազանցում է հանրապետության միջին ցուցանիշը: Գյումրիի ՏՀՏ-ում ևս մեկ ուշագրավ ցուցանիշ են արձանագրել. վերջին 6 ամիսների ընթացքում հաջողվել է կրկնապատկել ամսական ֆիսկալային հասույթների ծավալների հանրագումարը՝ 2,1միլիարդ դրամից հասցնելով 4 միլիարդի: 2011թ. մայիսին սկսված շինարարական աշխատանքների արդյունքում հիմնովին վերանորոգվել և ընդլայնվել է Գյումրիի ՏՀՏ վարչական շենքը, որտեղ կգործի նաև նորաոճ սպասարկման կենտրոնը՝ հարմարավետ աշխատասենյակներով՝ համալրված ժամանակակից համակարգչային տեխնիկայով և անհրաժեշտ այլ պարագաներով՝ դրանով իսկ առավել դյուրացնելով հարկ վճարողների աշխատանքը:

ՀՀ փոխվարչապետ, տարածքային կառավարման նախարար Արմեն Գևորգյանի խոսքով՝ «վերջին շրջանում անընդհատ բացվող սպասարկման կենտրոնները պետություն-բիզնես փոխհարաբերությունները գործընկերային ոլորտ փոխադրելուն ուղղված կառավարության քաղաքականության փաստացի վկայությունն են հանդիսանում: Հատկանշական է նաև այն փաստը, որ այս նորաբաց կենտրոնները մայրաքաղաքից բացի, բացվում են նաև մարզերում և սպասարկելու են մարզերի հարկ վճարողներին, ինչը էական նշանակություն ունի տարածքային համաչափ զարգացման տեսանկյունից»: Բարեփոխումների արդյունքում հարկ վճարողների սպասարկումն իրականացվում է «մեկ պատուհանի» սկզբունքով: Տեսչություն այցելելիս հարկատուներն այլևս ստիպված չեն լինի իրենց հուզող հարցերը պարզաբանելու կամ խնդիրներին լուծում տալու համար ավելորդ ժամանակ և միջոցներ վատնել՝ սենյակից սենյակ, հարկից հարկ անցնելով, այլ ցանկացած պատուհանից միանգամից կկարողանան սպառիչ պատասխան ստանալ: Արդյունքում՝ էապես նվազեցվում է հարկային տեսուչ-հարկատու շփումը: Սպասարկման կենտրոնի միջոցով է իրականացվում հարկատուների հետ տարվող աշխատանքի մոտ 90 տոկոսը, այդպիսով՝ շփումը տեսչության մյուս ստորաբաժանումների հետ հասցվում է նվազագույնի: Ինչպես Երևանի և մարզերի մյուս տեսչությունների սպասարկման սրահներում, այստեղ ևս այցելուներին հասանելի տեղում տեղադրված են տեղեկատվական տերմինալ, հայտարարությունների ցուցատախտակ, գովազդային հոլովակների մոնիտոր, որոնք իրենց հերթին նույնպես կնպաստեն հարկ վճարողների իրազեկման մակարդակի բարձրացմանը: Սպասարկման գրասենյակները, որպես մեկ միասնական տեղեկատվական համակարգ, Գյումրիի ՏՀՏ-ում ևս պահանջված են: Օրինակ՝ Շիրակի կամ հարակից մարզերի հարկ վճարողները նոր գաղափարի իրագործման շնորհիվ կկարողանան հենց Գյումրիից ներկայացնել հաշվետվություն կամ համապատասխան փաստաթղթեր ուղարկել առանց մաքսատներ կամ մաքսակետեր այցելելու:

Ինչպես լրագրողների հետ զրույցում նշեց ՊԵԿ Գյումրիի ՏՀՏ պետ Հրանտ Կարապետյանը, «դուք ինքներդ ականատես եղաք, թե նորակառույց ինչպիսի հարմարավետ և բարեկեցիկ պայմաններում են այսուհետ սպասարկվելու հանրապետության երկրորդ քաղաքի շուրջ 3800 գործող հարկ վճարողները, որոնց սպասրկման որակի բարձրացման նպատակով նորաբաց սրահում այցելուների համար ստեղծվել են բոլոր պայմանները՝ հիմնված հարկային մարմին-գործարար հարաբերություններն առավել փոխվստահելի դարձնելու նպատակակետին: Մեր տեսչությունում սպասարկվող հարկ վճարողների շուրջ 20 տոկոսն այսօր արդեն աշխատում է էլեկտրոնային հաշվետվությունների համակարգով, ինչը ՊԵԿ կողմից իրականացվող բարեփոխումների նկատմամբ վստահության բարձր ցուցիանիշի վկայությունն է հանդիսանում»,-նշել է ՏՀՏ պետը:

Այսպիսով, Գյումրիի տարածքային հարկային տեսչությունում գործող նորաբաց սպասարկման կենտրոնում ևս ստեղծված են բոլոր պայմանները հարկ վճարողներին արագ և որակյալ սպասարկելու համար: Կոմիտեի ղեկավարությունը հետևողական է հարկ վճարողների սպասարկումը միջազգային չափանիշներին համապատասխանեցնելու հարցում: