Վստահ եմ՝ արհեստական բանականության նկատմամբ վախերը կոտրելով՝ Հայաստանն աշխարհում լինելու է մրցունակ. Մխիթար Հայրապետյան

Փետրվարի 2-ին Երևանում անցկացվել է «Արհեստական բանականությունը բիզնեսի համար» խորագրով համաժողովը, որի նպատակն էր միավորել գործարար համայնքի ներկայացուցիչներին, նորարար մտածողներին և արհեստական բանականության (ԱԲ) ոլորտի փորձագետներին՝ արհեստական բանականության գերժամանակակից ռազմավարություններն ուսումնասիրելու նպատակով: Այդ մասին հայտնում են ՀՀ ԲՏԱ նախարարությունից։

ՀՀ բարձր տեխնոլոգիական արդյունաբերության նախարար Մխիթար Հայրապետյանը ողջույնի խոսքում անդրադարձել է վերջին տարիներին թե՛ Հայաստանում, թե՛ ամբողջ աշխարհում ԱԲ շուրջ շարունակվող բանավեճին և այն վախերին, որ ԱԲ գործիքները ժամանակի ընթացքում կարող են մրցակից դառնալ մարդկությանը և փոխարինել նրանց: Նախարարն առաջարկել է ավարտել այդ բանավեճը և մտածել ԱԲ գործիքներն արդյունավետ օգտագործելու և տնտեսության տարբեր ճյուղերում ներդնելու մասին:

«Այսօրինակ համաժողովները կարևոր են հասկանալու, թե որոնք են արհեստական բանականության գործիքների ներդրման ամենաարդյունավետ ճանապարհները: Այդ վախերը եղել են տեխնոլոգիական հեղափոխությունների տարբեր փուլերում, դրանք նոր երևույթ չեն և բնորոշ են մարդուն: Ես առաջարկում եմ պարզապես նայել առաջ: Այն ազգերը, որոնք երկար կմտածեն դրա շուրջ, հետ են մնալու ամբողջ աշխարհի զարգացումից: Հետևաբար, թռիչքաձև աճի համար մեզ անհրաժեշտ են մի քանի անգամ ավելի արագ որոշումներ և գործողություններ: Ես ինքս այլ կերպ չեմ պատկերացնում այդ թռիչքաձև աճի ապահովումը, քան հենց արհեստական բանականության և տեխնոլոգիական նոր լուծումների միջոցով:

Վստահ եմ, որ այդ վախերը կոտրելով՝ Հայաստանն աշխարհում լինելու է մրցունակ: Միայն այդ ճանապարհով է, որ Հայաստանը կարող է դառնալ հավակնոտ երկիր և աշխարհում ունենալ իր կարևորագույն և նշանակալից դերը, աշխարհին նոր լուծումներ առաջարկել, ինչն էլ իր հերթին վերափոխելու է Հայաստանի և, առհասարակ, հայ մտածողի, արարողի նկատմամբ աշխարհի վերաբերմունքը»,-նշել է նախարարը:

Ելույթներով հանդես են եկել նաև ՀՀ Ազգային Ժողովի նախագահի տեղակալ Հակոբ Արշակյանը, ՀՀ էկոնոմիկայի նախարար Վահան Քերոբյանը, ՀՀ կենտրոնական բանկի նախագահ Մարտին Գալստյանը: Համաժողովի բանախոսներն էին Մոքսի ռոբոտը ստեղծած «Embodied» ընկերության հիմնադիր և գործադիր տնօրեն Պաոլո Պիրջանյանը, «McKinsey & Company» խորհրդատվական ընկերության գործընկեր Լեոնիդ Կիրակոսյանը և «ABBY» ընկերության հիմնադիր Դավիթ Յանը: Ելույթներից հետո տեղի է ունեցել պանելային քննարկում՝ «Արհեստական բանականության օգտագործումը ավանդական բիզնեսում» թեմայով: