Համաներման ակտի կիրառման հարցը վերանայելու արդյունքում ազատ արձակվեց ևս 6 հոգի

Իրավունք 30 Դեկտեմբեր, 2011 8:27

«Հայաստանի Հանրապետության անկախության հռչակագրի 20-րդ տարեդարձի կապակցությամբ համաներում հայտարարելու մասին» Հայաստանի Հանրապետության Ազգային ժողովի 26.05.2011թ. ԱԺՈ-277-Ն որոշման կիրառման պրակտիկայի կապակցությամբ Հայաստանի Հանրապետության դատաիրավական համակարգի ներկայացուցիչների մասնակցությամբ Հանրապետության նախագահի մոտ տեղի ունեցած խորհրդակցության ժամանակ նախագահը հանձնարարական էր տվել՝ ուսումնասիրել համանարեման կիրառման արդյունքում ծագած խնդիրները:

Հանրապետության նախագահի աշխատակազմի, ՀՀ գլխավոր դատախազության, ինչպես նաև ՀՀ արդարադատության նախարարության կատարած ուսումնասիրությունների արդյունքում պարզվել է, որ 15 դատապարտյալների նկատմամբ համաներման ակտը չկիրառելը իրավաչափ չի եղել:

15 դատապարտյալ ս/թ դեկտեմբերի 27-ին համաներման ակտի կիրառման հարցը վերանայելու վերաբերյալ դիմումներ են ներկայացրել ՀՀ արդարադատության նախարարին: Վերջինիս հանձնարարականով այդ գործերը վերանայվել են, արդյունքում՝ Ռաֆայել Ջնդոյի Վարդանյանի, Ալիկ Դերենիկի Մկրտչյանի, Վիտալի Վլադիմիրի Առաքելյանի, Խաչատուր Գագիկի Դավոյանի, Էդվարդ Հովհաննեսի Շահնազարյանի, Մհեր Վաչագանի Վարդանյանի նկատմամբ կիրառվել է համաներում և վերջիններս ս/թ դեկտեմբերի 28-ին արդեն պատժի կրումից ազատվել են:

Համաներման ակտը կիրառվել և նշանակված պատիժը համապատասխան չափով կրճատվել է 7 դատապարտյալի՝ Արթուր Ռոբերտի Ավալյանի, Արթուր Յուրի Մեժլումյանի, Եղիա Հակոբի Հովհաննսիյանի, Էդգար Անդրանիկի Կարապետյանի, Ռուզվելտ Յուրիկի Մարտիրոսյանի, Վոլոդյա Արթուրի Մարիկյանի, Էդգար Նշանի Մուրադյանի նկատմամբ :

Եվս 2 դատապարտյալի՝ Վարդան Սերյոժայի Գևորգյանի և Արթուր Սերգեյի Ջավադյանի նկատմամբ համաներման ակտը կիրառելու համար կատարվել են հարցումներ՝ վերջիններիս կողմից հանցագործությամբ պատճառված գույքային վնաս չունենալու հանգամանքը ճշտելու կապակցությամբ, իսկ դրական արդյունքների դեպքում նրանց նկատմամբ նշանակված պատիժը համապատասխան չափով կկրճատվի: