Ինչ է հայտնի ՀԱՄԱՍ-ի նոր ղեկավարի մասին

ՀԱՄԱՍ-ի քաղաքական առաջնորդ Հանիեյի սպանությունից հետո կազմակերպությունը նոր առաջնորդ ունի՝ Յահյա Սինվարը: Սինվարն արդեն հասցրել է զարմացնել բոլորին իր տարօրինակ «խաղաղասիրությամբ»։ Մասնավորապես, խոսում են այն մասին, որ վերջինս լուրջ տարաձայնություններ ունի ՀԱՄԱՍ-ի ռազմական թևի հետ ու վերջինիս հայացքները խիստ տարբերվում են ՀԱՄԱՍ-ի ղեկավարության մյուս հատվածների կարծիքից։ Վերջինս նամակով դիմել է մյուս ղեկավարներին, հորդորելով հատկապես Քաթարում հաստատված ՀԱՄԱՍ-ի ղեկավարներին չխառնվել ու բանակցություններ չվարել: Վերջինս ուզում է Իսրայելի հետ բանակցություններ սկսել ու դադարեցնել կրակը մինչև Իրանը կհասցնի Իսրայելին պատասխան հարվածը:

Լիբանանցի քաղաքագետ Ջամալ Վակիմը «Հրապարակ»-ի  հետ զրույցում ասաց, որ ՀԱՄԱՍ-ը մի կազմակերպություն է, որը տարատեսակ ճնշումների է ենթարկվում վերջին չորսից հինգ տասնամյակները։ Հարցին, արդյոք Սինվարի հայտարարությունը նշանակում է, որ ՀԱՄԱՍ-ը սկսում է պառկատվել, ասաց, որ նոր լիդերի քայլերը ամենևին չեն խոսում կազմակերպության մասնատման մասին։

«Սա ՀԱՄԱՍ-ի միասնական քաղաքական ղեկավարության կողմից ավելի վաղ հաստատված քաղաքական գծի շարունակությունն է։ Սինվարը չնայած որ պոլիտբյուրոյի ղեկավարն է, չի կարող իր հայեցողությամբ գործողություններ ձեռնարկել։ Այսպիսով, սա է իրենց որոշումը»,-ասաց լիբանանցի քաղաքագետը:

Եվ այսպես, ինչ գիտենք մենք ՀԱՄԱՍ-ի նոր ղեկավարի մասին․ Յահյա Սինվարը պայքարել է իսրայելական օկուպացիայի դեմ դեռևս մանուկ հասակից։ Իր կյանքի երեք տասնամյակները Սինվարը բանտում է անցկացրել՝ իսրայելական օկուպացիայի դեմ պայքարի համար, մինչև ազատ արձակվելը 2010-ին:

«Նա համառ է, նա ոգևորված է, նա հավատում է իր նպատակների արդարացիությանն ու դրանց իրականացմանը: Միանշանակ է, որ նա կոռումպացված չէ, նա շատ շիտակ ու ազնիվ մարդ է, սա է նրա բնութագիրը: Բայց սա չի նշանակում, որ նա կարող է ղեկավարել ՀԱՄԱՍ-ը միանձնյա: Մենք գիտենք, որ ՀԱՄԱՍ-ը ունի ինստիտուտներ, որոնք ապահովում են կազմակերպության գծի շարունակականությունը և Սինվարը ենթարկվելու է հենց այդ գծին»,-նկատեց Վակիմը:

Լիբանանցի քաղաքագետը նշում է, որ Սինվարը ՀԱՄԱՍ-ի ամենաականավոր գործիչներից է, և նա գիտի Իրանի դերը ՀԱՄԱՍ-ի պայքարում և հետագայում անվերապահորեն գնալու է Իրանի հետ մերձեցման:

«Սինվարը՝ որպես պոլիտբյուրոյի ղեկավար, կամուրջ է գծում ՀԱՄԱՍ-ի քաղաքական և ռազմական ղեկավարության միջև՝ հօգուտ ռազմական ղեկավարության, և սա ավելի է ամրաcնում հետագայում օկուպացիոն ռեժիմի դեմ պայքարում նրանց հաստատակամությունն ու ուժեղությունը»,-ասաց Վակիմը:

Բավականին հետաքրքիր էր լսել լիբանանցի քաղաքագետի կարծիքը Սինվարի քաղաքականության մասին, որովհետև բազմաթիվ քաղաքական շրջանակների մոտ տարակուսանք է առաջացրել վերջինիս շտապողականությունը՝ համաձայնության գալ Իսրայելի հետ, մինչ Իրանը կհասցներ պատասխան հարվածը Թեհրանում Հանիեյի սպանության համար: