Ոչ մի արեւմտյան երաշխիք եւ հզոր սպառազինություն այլեւս չեն կարողանալու փոխել հայ-ադրբեջանական հարաբերությունների այս բնույթը. Օհանյան

«Հրապարակի» խմբագիր Արմինե Օհանյանը գրել է.

«Գիտակից մարդիկ հասկանում են, որ սպառնալիքներից, շանտաժից երբեք չի կարելի վախենալ: Մեկ անգամ վախեցար, վախերդ ցույց տվեցիր` վերջ. դառնում ես շանտաժիստի հավերժ պատանդը: Ալիեւի ու մեր թշնամիների սպառնալիքներից վախեցած եւ անվերջանալի զիջումների գնացող Նիկոլ Փաշինյանը` վառ օրինակ: Ոչ մի արեւմտյան երաշխիք եւ հզոր սպառազինություն այլեւս չեն կարողանալու փոխել հայ-ադրբեջանական հարաբերությունների այս բնույթը` ՀՀ վարչապետն արդեն մեկ եւ ավելի անգամներ ցույց է տվել իր վախերը, զիջել է, նահանջել է եւ շանտաժիստը գիտակցել է իր ուժը:

Ընդ որում, սպառնալիքներից ու շանտաժից չպետք է վախենան նաեւ քաղաքական ուժերը, անհատները, որովհետեւ նույն սխեման գործում է նաեւ այստեղ: Շատ հեռու չգնանք. ընդամենը տեսեք, թե ինչ վիճակում են հայտնվել այս իշխանությունների հետ գործարքի գնացողները, որ իրավապահներից վախեցած ասում են` «մի բան զիջենք, մնացածը պահենք», մի քիչ ծառայենք` բարեհաճությանն արժանանանք: Հովիկ Աբրահամյանի ընտանիքը 18-ից հետո գնաց գործարքի եւ անգամ 21-ի ընտրություններում աջակցեց ՔՊ-ին` հիմա ունեցվածքն են խլում, որդու դեմ գործ են հարուցել: ՊԵԿ նախկին նախագահ Գագիկ Խաչատրյանը եւ նրա որդիները, որոնք ո՛չ քննադատել են Փաշինյանին, ո՛չ աջակցել ընդդիմությանը, ավելին` ինչքան պահանջել են, «մուծվել են», ինչ խլել են` լռել են, ԱՄՆ-ում դղյակը կամովին համաձայնել են վաճառել եւ գումարի մի մասը փոխանցել

«Հայաստանի Հանրապետությանը՝ ի շահ հայ ժողովրդի»: Անգամ երբ իշխանությունը որոշեց Փաշինյանին քննադատելու համար փակել Վլադիմիր Սոլովյովի հաղորդաշարը, «Յուքոմը», որը որեւէ պարտավորություն չուներ այդ որոշմանը միանալու, կամովին միացավ: Այսինքն, ո՛չ փողով, ո՛չ սիրաշահելով, ո՛չ ծառայելով, մեծ հաշվով, չհասան արդյունքի: Նախկին հզոր Գագիկ Խաչատրյանին տարիներ շարունակ` սայլակի վրա դատարան են բերում-տանում: Այնպես որ գործարքի գնալը բոլոր առումներով է սխալ»: