Մարդ լինել․ Բաքվում գերեվարված Ռուբեն Վարդանյանի մասին ֆիլմ կթողարկվի

«Ռուբենը սովորեցնում է մարդ լինել։ Եվ նա դա սովորեցնում է ոչ թե դոգմաներով, ոչ խրատներով, ոչ ելույթներով, այլ իր օրինակով ու կյանքով»,- այսպես է նկարագրել Բաքվում գերեվարված Ռուբեն Վարդանյանի մասին պատմող ֆիլմի հեղինակ Արտյոմ Աղաբեկովը։ 
Հեղինակի խոսքով՝ ֆիլմը ստեղծվել է Ռուբենից գաղտնի․ 

«Եթե նա իմանար այս գաղափարի մասին, անշուշտ, մեզ խորհուրդ կտար մեր ժամանակը և էներգիան ծախսել ավելի լավ բանի վրա, բայց այստեղ մենք չենք համաձայնվի նրա հետ։

Այս ֆիլմում Ռուբենի մասին խոսում են մարդիկ, որոնց հետ ճակատագիրը միավորել է նրան։ Այս պատմության միջոցով մենք փորձեցինք ցույց տալ, թե ինչի կարող է հասնել մարդը, եթե այն ամենը, ինչ ունի, ծառայեցնի ուրիշներին և հավատարիմ մնա իրական մարդկային արժեքներին: 

Օգնության խիստ կարիք ունեցող մարդկանց ծառայելու ցանկությունը Ռուբենին դրդեց տեղափոխվել Արցախ։ Նա շատ լավ հասկանում էր այդ որոշման բոլոր ռիսկերը, բայց այլ կերպ չէր կարող վարվել։ Թե ինչ եղավ հետո, բոլորս գիտենք։ 
 

Կասկած չկա, որ Ռուբենը քաղբանտարկյալ է։ Եվ ազատազրկումը անօրինական է: Մենք մեծ հույս ունենք, որ Ռուբենը շուտով կվերադառնա, և մեր ֆիլմը նվիրում ենք նրան, իր մտերիմներին և բոլոր նրանց, ում նա թանկ է: Սպասում ենք քեզ, Ռուբեն»,- նշել է Աղաբեկովը։