Հայտնի դաշնակահար Դենիս Մացուեւը մենահամերգ կունենա Երեւանում

«Երեւանյան Հեռանկարներ» միջազգային երաժշտական փառատոնը շարունակելով  իրադարձային համերգների շարքը՝ հրավիրում է վայելելու աշխարհահռչակ երաժշտ Դենիս Մացուեւի կատարումները։
Մեր ժամանակների տաղանդաշատ դաշնակահարներից մեկը, ով համագործակցում է աշխարհի լավագույն նվագախմբերի եւ դիրիժորների հետ, ելույթ կունենա նոյեմբերի 9-ին՝ Արամ Խաչատրյանի համերգասրահում:

Համերգային ծրագրում ընդգրկված են դասական երաժշտության գլուխգործոցներ՝ Յոհան Սեբաստիան Բախ՝ «Չակոնա» թիվ 2 Պարտիտից, դաշնամուրի համար փոխադրումը՝ Ֆ. Բուզոնիի, Լյուդվիգ Վան Բեթհովեն՝ Սոնատ թիվ 23, երկ 57, ֆա մինոր, «Ապասիոնատա», Էդվարդ Գրիգ՝ «Բանաստեղծական պատկերներ», Սերգեյ Պրոկոֆեւ՝ Սոնատ թիվ 8, երկ 84, սի բեմոլ մաժոր։ Տոմսերը կարող եք ձեռք բերել փառատոնի պաշտոնական հարթակից։