Հնագետները վիկինգների 50 լավ պահպանված կմախք են հայտնաբերել

Դանիայում հնագետները վեց ամսվա պեղումների ընթացքում վիկինգների 50 կմախք են հայտնաբերել, հաղորդում է CBS News-ը։

Օդենսեի թանգարանի հնագետ Մայքլ Բորե Լունդեն ասել է, որ իրեն հաջողվել է գտնել երկու հազար քառակուսի մետր թաղման տարածք՝ պատրաստված 9-10-րդ դարերում։ Նա նշել է, որ հայտնաբերված մնացորդները՝ ավելի քան հազար տարեկան, այնքան լավ են պահպանվել, որ գիտնականները հույս ունեն դրանցից ԴՆԹ նմուշներ կորզել՝ ավելի մանրամասն ուսումնասիրության համար։

Հնագետներին հաջողվել է պարզել, որ կմախքների մի մասը պատկանում է հասարակության մեջ բարձր դիրք զբաղեցնող մարդկանց։ Այսպես, կանանցից մեկին հայտնաբերել են սայլի մեջ։ Նրա հետ կար ապակե ուլունքներից պատրաստված վզնոց, արծաթե փորագրություններով զարդարված դանակ և ապակու փոքրիկ բեկոր, որը, ամենայն հավանականությամբ, ամուլետ է եղել։ Նրա հետ նաև մի սնդուկ կար թաղված։ Մեկ այլ կմախքի վզին մետաղյա օղակ կար, իսկ մյուսը կարմիր ապակե ուլունք ուներ։

Ենթադրվում է, որ մնացորդների մեծ մասը կապված է առևտրականների հետ։ Լունդեն նշել է, որ այս հայտնագործությունը կօգնի ավելին իմանալ վիկինգների սննդակարգի և առողջության մասին։

Ավելի վաղ հաղորդվել էր, որ դանիացի հնագիտության ուսանողը հնագույն բնակավայրում հայտնաբերել է վիկինգների դարաշրջանի յոթ արծաթե ապարանջան։ Ապարանջանների ընդհանուր քաշը ավելի քան 500 գրամ է։

Ներսեսյան Լարիսա