«Եթե Մարգար Օհանյանը յուրացումներ է կատարել, ապա պատասխան կտա». ամիսներ առաջ «չորով» հայտարարել էր Ալիկ Սարգսյանը

Նախկին ոստիկանապետ, այժմ նախագահի խորհրդական Ալիկ Սարգսյանի համոզմամբ, Ճանապարհային ոստիկանության նախկին պետ Մարգար Օհանյանի խափանման միջոցը պետք է փոխվի եւ նա պետք է ազատության մեջ լինի, հաղորդում է Ազատություն ռադիոկայանը:

«30 տարի նա այս երկրին ծառայել է, ասենք մի անգամ սխալվել է, վնասն էլ վերականգնված է, չարժի նրան դատել որպես սովորական հանցագործի, ասել՝ քրեական հանցագործ է, թող գնա միանգամից բերդում նստի, որովհետեւ կարող է խանգարել: Կարծում եմ, այստեղ բարոյական պահ կա: Ես որ անհարմար չզգայի, ինքս կգնայի այսօր դատարան, դատավորին կխնդրեի. ով ինչ կուզեր թող իմ մասին մտածեր, ես եմ գործը հասցրել մինչեւ վերջ, ես էլ գտնում եմ, որ նա այսօր պիտի դրսում լիներ», ասել է Սարգսյանը:

«Երբ որ բենզինի չարաշահման փաստը արդեն հիմնավորվել էր, արդեն ամեն ինչը բացահայտվում էր, ես՝ որպես պաշտոնյա, դա թաքցնել չէի կարող, ավելին՝ ես ուզեցի նույնիսկ իրեն մի անգամ հրավիրել, եւ ասացի ընկերների միջոցով՝ եթե ինքը տեղյակ է, թող վաղը գա ինձ ասի, որ ես տեղյակ եմ չարաշահումից: Միգուցե ես ներելու հնարավորություն ունեի, կամ գործը մի քիչ այլ կերպ կներկայացնեի, վնասի վերականգնելը ներառյալ: Բայց ամեն դեպքում նա վերջին պահին էլ հրաժարվեց, որ ընդհանրապես տեղյակ չէ, ավելին՝ ասաց, ես եմ խնդրում, թող մինչեւ վերջ ստուգումը կատարեն: Ես էլ իմ ստուգումը կատարել եմ մինչեւ վերջ: Հիմա ամեն ինչ կանեի, որ այս ամեն ինչը եղած չլիներ, նա դրսում լիներ, որովհետեւ իմ համար իրոք շատ ծանր է, շատ վատ բան եղավ իմ կենսագրության մեջ՝ անկախ իմ կամքից», նկատել է  նախկին ոստիկանապետը:

Մինչդեռ 2011թվականի օգոստոսի 28–ին Ալիկ Սարգսյանն անդրադառնալով իր և Ճանապարհային ոստիկանության պետ Մարգար Օհանյանի հարաբերություններին, նշել էր, որ երբ իր ղեկավարած համակարգում չարաշահումներ է հայտնաբերում և գործերն ուղարկում է համապատասխան մարմիններ, դա պետք է ողջունել, այլ ոչ թե քննադատել:

Նա նշել էր, որ Մարգար Օհանյանի հետ երկար տարիներ ամենալավ մարդկային հարաբերություններն ունեն, և այսօր էլ իրար թշնամի չեն կարող համարել, սակայն համապատասխան ինֆորմացիա է ստացել, որ Ճանապարհային ոստիկանությունում լուրջ չարաշահումներ կան։

«Ես հանձնարարել եմ վեցերորդ վարչությանը և այլ համապատասխան մարմինների համատեղ միջոցառումներ ձեռնարկել' ստուգելու օպերատիվ ինֆորմացիան: Ինչի արդյունքում բացահայտվեցին այնպիսի հանգամանքներ, որոնք ոչ ներելի են, ոչ թաքցնելու են և ոչ էլ ես իմ տեսակով կարող եմ մարսել»,- նշել էր նախկին ոստիկանապետը:

Նա ընդգծել էր. «Եթե պարզվի, որ նա տեղյակ է եղել, և այդ վառելիքից նա էլ է օգտվել, ապա նա էլ սովորական մյուս քաղաքացիների և ընդհանրապես ոստիկանների նման նույնպես պատասխան կտա»։ 

Այսօր արդեն նախկին ոստիկանապետը մեղմացրել է գնահատականները. հիմա նա անգամ պատրաստ է գնալ դատավորի դուռը եւ ազատություն խնդրել երբեմնի գործընկերոջ համար։ Հարց է առաջանում՝ ինչո՞ւ է իրար խառնվել Ալիկ Սերգեյիչը. գուցե լուրջ է ընդունել Մարգար Օհանյանի՝ երեկ դատարանում արած ակնարկները, թե ինքն անուններ է հնչեցնելու։ Բոլոր դեպքերում հետաքրքիր իրավիճակ է, եւ Ալիկ Սարգսյանն այս իրավիճակում եւս իրեն պահում է անտաղանդ ծաղրածուի պես։