Մարդու Իրավունքների Միջազգային Ֆեդերացիայի գործադիր տնօրեն պարոն Անտուան Բեռնարին

Ցավով ընթերցեցինք Եհովայի դատապարտված վկայի վերաբերյալ Քաղաքացիական Հասարակության Ինստիտուտի և ձեր կազմակերպության ապատեղեկություն պարունակող հայտարարությունը, որտեղ Դուք պահանջում եք ազատ արձակել Եհովայի վկա Անդրանիկ Մակվեցյանին և, հիմնվելով Ձեզ ներկայացված խեղաթյուրված փաստերի վրա, երկրում «կրոնական ազատությանն» առնչվող քայլերի կոչ եք անում:

Հիասթափեցնող է նմանատիպ հայտարարություն կարդալ մի կազմակերպության կայքում, որի նպատակը մարդկային հիմնարար ազատություններն օբյեկտիվորեն պաշտպանելն է` հարգելով նաև բոլոր շահագրգիռ կողմերի կարծիքներն ու իրավունքները:

Մարդու Իրավունքների Միջազգային Ֆեդերացիան հաղորդում է երկու անձանց մասին, “ովքեր քարոզել են երկու քաղաքացիների Երևանի Սուրբ Երրորդություն Եկեղեցու մերձակայքում: Տեր Եսայի քահանան (Արտակ Արթենյան) կարգադրել է քարոզիչներին հեռանալ, ինչն էլ Անդրանիկ Մակվեցյանի հետ վեճի պատճառ է հանդիսացել”:

Իրականում այդ ամենը տեղի է ունեցել ոչ թե Եկեղեցու մերձակայքում, այլ 

հենց Եկեղեցու տարածքին հարող ճանապարհի այն հատվածում, որով անցնում են հիմնականում Եկեղեցի հաճախող հավատացյալները: Դա եղել է ոչ թե վեճ, այլ` քահանայի վրա անհիմն ֆիզիկական բռնության գործադրում: Սա Հայաստանում անհանդուրժողականության անհիմն պատրանք ստեղծելուն միտված փորձ է, որ քաղաքական նպատակներ ունի:

Ցավով ենք արձանագրում, որ այս դեպքը եզակի չէ: Այսպիսի դեպքեր հաճախ են եղել, նույնիսկ արձանագրվել են սրբապղծության նախադեպեր, որոնք կարող են ցավալի հետևանքներ ունենալ և կրոնական հողի վրա անհանգստությունների պատճառ դառնալ:

Եթե ձեր կազմակերպությունը նպատակ ունի պաշտպանել հասարակական կարգ խախտողներին, կրոնական մյուս համայնքների և կազմակերպությունների սրբություններն ու գույքը ոտնահարողներին, ապա մենք հարկադրված ենք ընդդիմանալ նման գործելաոճին:

Մեզ համար անհասկանալի է ձեր դիրքորոշումը, և անհնար է կիսել ձեր կարծիքը: Մենք համարում ենք, որ դատարանի որոշումը արդար էր և տեղին:

Եհովայի վկաների կողմից կատարվող խախտումներն ու սադրանքները, որոնք ուղղված են միջազգային կազմակերպությունների շահարկմանն ու միջազգային հանրության կարծիքի խեղաթյուրմանը, ընդունելի չեն Հայ Եկեղեցու հավատացյալների կամ հասարակական առողջ որևէ խմբի կողմից:

Մենք ակնկալում ենք, որ կոչով կդիմեք նաև Եհովայի վկաներին` դադարեցնելու նմանատիպ գործունեությունը, ինչպես նաև կհրաժարվեք Ձեր և ձեր կազմակերպության կողմից ներկայացված հայտարարությունից, ներողություն կխնդրեք, իսկ ապագայում առավել շրջահայացություն և պրոֆեսիոնալիզմ կդրսևորեք:

Համաշխարհային Խորհրդի Հայաստանյան Կլոր Սեղան հիմնադրամ

Հայաստանի Հանրապետություն Եզդիների Ազգային Միություն 

Հայաստանի Հանրապետություն Հրեական Համայնք

Հայ Կաթոլիկէ Ժողովրդապետություն

«Ֆորմիկա Արտ» ՍՊԸ

Հայաստանի Ռուս Ուղղափառ Եկեղեցի

«Հայ Օգնության Միություն» Բարեգործական ՀԿ

«Հայ Ձմեռ Պապ» Բարեգործական հիմնադրամ

«Փյունիկ» Միություն» ՀԿ

«Խաչակիր» Մշակութային Հկ

«Պետական ծառայողների իրավունքի պաշտպանության միություն» ՀԿ