Ինչո՞ւ ռուսերեն. աղմուկ նախարարի ֆեյսբուքյան էջում

ՀՀ կրթության եւ գիտության նախարար Արմեն Աշոտյանի ֆեյսբուքյան էջում հայոց լեզվի կենացը խմելուց հետո՝ ստատուսի ներքո արդեն մի քանի օր է բավականին ակտիվ եւ ագրեսիվ քննարկումներ են ընթանում: Խոսքը հայկական եթերում «Ի՞նչ, որտե՞ղ, ե՞րբ» հաղորդման մասին է, որի տոնական թողարկմանը մասնակցում էին հայ քաղաքական գործիչներ` պատգամավորներ եւ նախարարներ, ովքեր ամբողջ խաղի ընթացքում խոսել եւ հարցերին պատասխանել են ռուսերենով:

Նախարար Արմեն Աշոտյանը փորձել է վերջակետ դնել քննարկումներին` ափսոսանք հայտնելով, որ նույնիսկ սովորական խաղն է քաղաքականացվում: Ի դեպ` բոլորից ակտիվ եւ ագրեսիվ, քննարկումներին մասնակցել է ՀՅԴ խմբակցության պատգամավոր Լիլիթ Գալստյանը: ԼՈՒՐԵՐ.com կայքը իրավացիորեն նկատել է, որ հաղորդմանը ոչ վաղ անցյալում մասնակցել է կարկառուն դաշնակցական Վահան Հովհաննիսյանը եւս, որի ամանորյա ուղերձներն իր ֆեյսբուքյան էջում եւս եղել են ռուսերեն լեզվով: Քննարկմանը մասնակցող որոշ պատգամավորներ պնդել են, թե ռուսերենով խաղի եթեր հեռարձակելը օրենքի խախտում է:

ԼՈՒՐԵՐ.com-ի թղթակիցը «Ի՞նչ, որտե՞ղ, ե՞րբ» հեռուստանախագծի հաղորդավար եւ հաղորդման գլխավոր պրոդյուսեր Կարեն Քոչարյանին խնդրել է մեկնաբանել ստեղծված իրավիճակը: Վերջինս էլ ասել է. «Թող օրենքը ուշադիր կարդան, օրենքի ոչ մի խախտում այնտեղ չկա, որովհետեւ խաղը գնում է ոչ թե հանրային հեռուստատեսությամբ, այլ մասնավոր հեռուստաալիքով, իսկ մասնավորներում թույլատրվում է մինչեւ 20% ազգային փոքրամասնությունների համար օտարալեզու հաղորդումներ անել։ Ես այս հաղորդումը անում եմ ազգային փոքրամասնությունների համար»,- նշել է նա՝ անդրադառնալով խնդրին իրավաբանական հարթության մեջ։

Կարեն Քոչարյանը կայքի թղթակցի հետ զրույցում նաեւ կարծիք է հայտնել, որ խնդիրը այդ հարթությունը ուղղորդելու պատճառով խաղը քաղաքականացնելու ձգտումն է, քանի որ, ըստ նրա, երեք տարի հեռարձակվող խաղի ռուսերեն անցկացվելը ուղղակի չէին կարող նոր նկատել։ «Իսկ, եթե հարցը կենցաղային հարթության մեջ դիտարկենք, խաղը խաղում են ռուսերեն, քանի որ դրա վերջնական նպատակը այն է, որ մեր խաղացողները գնան Մոսկվա էլիտար ակումբում խաղալու։ Դժվար հայերենով այնտեղ խաղան»,-  նշել է նա՝ բացատրելով, որ սա միջազգային խաղ է, եւ խաղի լեզուն ռուսերենն է։ «Նախընտրական շրջան է, փորձում են իրենց արեւին դիվիդենտներ քաղել»,-  ասել է Քոչարյանը` նկատելով, որ եթե դա չլիներ պատճառը, ապա մեղադրանքներ ներկայացնողները կնկատեին նաեւ այլ հաղորդումները, որոնք «ոսկեղենիկ հայերեն» չեն մատուցվում։