Ավինյանը չէր կարող չնկատել, որ գտնվում է բիզնես դասում․ Իզաբելլա Աբգարյան

Երևանի ավագանու «Ազգային առաջընթաց» խմբակցության քարտուղար Իզաբելլա Աբգարյանը լրագրողների հետ զրույցում, անդրադառնալով Երևանի քաղաքապետ Տիգրան Ավինյանի՝ ԱՄՆ տոմսի արժեքին, ասաց, որ նա չէր կարող չնկատել, որ ինքը գտնվում է բիզնես դասում, որն արդեն իսկ թանկ է։

«Դա կոչվում է բյուջեի վատնում, ինչի հիման վրա ավագանին կարող է իմպիչմենթի ենթարկել քաղաքապետին»,– ասաց նա։

Անդրադառնալով Տիգրան Ավինյանին անվստահություն հայտնելու հնարավորությանը՝ Աբգարյանն ասաց. «Երբ նման հնարավորություն լինի և ընդդիմության ներսում հաջողվի կոնսենսուս ձեռք բերել, որպեսզի ունենանք այդ անհրաժեշտ ձայները, ապա կանենք: Այս պահի դրությամբ մենք չունենք, մեզ պետք են երեք ընդդիմադիր խմբակցությունների ձայները, որ միահամուր պատրաստ լինեն գնալ այդ քայլից: Բացի այդ, երկրորդ հարցն այն է, որ միասնական թեկնածու պետք է առաջադրվի, այսինքն՝ դա այդպես արագ, հեշտ գործ չէ»:

Հիշեցնենք, որ Տիգրան Ավինյանը դեկտեմբերի 23-ին հայտարարեց, որ տեղին են քննադատել ԱՄՆ կատարած իր այցի ավիատոմսերի ձեռք բերման հարցը։

«Ես ինքս, իհարկե, արդեն այցից հետո տեղեկացա, թե ինչ գներով են ձեռք բերվել, մասնավորապես ինձ համար տոմսերը, և, անկեղծ ասած, նույնպես մի փոքր ապշած էի այդ թվերից»,- ասաց նա։

Ավինյանի խոսքով՝ պատճառը տոմսերն ուշ ձեռք բերելն էր։ Նա նշեց, որ պատրաստ է անձամբ փոխհատուցել այդ գումարը։