Կարեն Անդրեասյանն անդրադարձել է զինվորի մահվան դեպքին

Դեկտեմբերի 30-ին ջրծաղկից մահացած ժամկետային զինծառայող Հայկ Խաչատրյանի մահվան առթիվ հաղորդագրություն է տարածել Մարդու իրավունքների պաշտպան Կարեն Անդրեասյանը։ 

«Տեղեկանալով ժամկետային զինծառայող Հայկ Խաչատրյանի մահվան մասին՝ Մարդու իրավունքների պաշտպանն իր ցավակցությունն է հայտնում մահացած զինվորի հարազատներին եւ իր խորին մտահոգությունն արտահայտում բանակում տեղի ունեցած այս ողբերգական մահվան կապակցությամբ:

Հաշվի առնելով, որ գործը գտնվում է նախաքննության ընթացքում, դեռեւս չկա համապատասխան մարմնի կողմից առաջադրված հստակ վարկած եւ հայտնի չէ մահվան իրական պատճառը՝ Պաշտպանն առայժմ զերծ կմնա  գնահատականներից:

Այդուհանդերձ, հաշվի առնելով, որ մահացած զինվորի հարազատները հրապարակել են իրենց դժգոհությունները զինվորին բուժօգնություն տրամադրելու վերաբերյալ, եւ նկատի ունենալով այն հանգամանքը, որ խնդիրների մասին վաղօրոք ահազանգումը կարող է կանխել ողբերգական հետեւանքները՝ դիմում ենք բոլոր զինծառայողներին, նրանց ծնողներին, հարազատներին եւ ընկերներին հնարավորինս արագ ահազանգել իրենց հայտնի խնդիրների, միջադեպերի, բողոքների մասին՝ զանգահարելով 1-1-6 Պաշտպանի թեժ գծին:

Շահագրգիռ անձանց վաղօրոք ահազանգը եւ մեր միջամտությունը կարող են կանխել ցավալի հետեւանքները նմանատիպ եւ այլ իրավիճակներում»,-ասվում է ՄԻՊ հաղորդագրության մեջ։

Հիշեցնենք, որ զինծառայողը մահացել էր Նորքի ինֆեկցիոն հիվանդանոցում։ Զինվորի մահվան փաստի առթիվ ՊՆ քննչական ծառայության 4-րդ կայազորային քննչական բաժնում հարուցվել է քրեական գործ ՀՀ քր. Օր.-ի 376 հոդվածի 2-րդ մասով (անփույթ վերաբերմունք ծառայության նկատմամբ, որն առաջացրել է ծանր հետեւանքներ):